Á morgun weu sveitarstjórnarkosningar á Íslandi en á meðan kosningabaráttunni hefur staðið hafa sveitarstjónir, ráð og nefndir haldið starfsemi sinni ótrauð áfram. Í þessari viku hafa farið fram síðustu fundir fyrir kosningar og þar á meðal í bæjarráði Hafnarfjarðar. Meðal þess sem var rætt á fundinum var samningur bæjarins um heilsuþjónustu við hóp lækna. Þjónustunni er ætlað að veita litlum hluta af starfsfólki bæjarins þjónustu vegna heilsufars og er að sögn ætlað að bregðast við háu veikindahlutfalli meðal starfsfólks bæjarins. Fulltrúar minnihlutans í bæjarráði gagnrýndu gerð samningsins og sögðu hann aldrei hafa verið kynntan í ráðinu áður en gengið var frá honum. Fulltrúar meirihlutans neituðu því og sögðu samninginn fyrst hafa verið kynntan á fundi ráðsins í febrúar en í fundargerð þess fundar er hins vegar ekki minnst á umræddan samning með beinum hætti.
Um er að ræða samning við heilsuþjónustuna Lifeline Health. Heimasíða þjónustunnar er enn í vinnslu en á Facebook-síðu hennar segir:
„Lifeline Health er heildræn heilsuþjónusta byggð upp af læknum á Íslandi með fókus á fjórar grunnstoðir heilsu: hreyfing, næring, svefn og andleg heilsa. Við bjóðum upp á heilsufarsskoðanir og persónusniðin heilsuplön.“
Að öðru leyti er ekki miklar upplýsingar að finna á Facebook-síðunni.
Auk Hafnarfjarðarbæjar hefur verið gerður samningur við Vestmannaeyjabæ en í tilkynningu frá síðarnefnda sveitarfélaginu um samninginn sagði að hann snerist um heilsufarsskoðanir og heilsueflingu fyrir starfsfólk bæjarins. Markmiðið með þessu væri að styðja við heilbrigði, vellíðan og forvarnir starfsfólks með faglegri og einstaklingsmiðaðri nálgun.
Kynning
Á fundi bæjarráðs Hafnarfjarðar í vikunni lögðu fulltrúar Samfylkingarinnar, sem eru í minnihluta fram ýmsar spurningar um samning bæjarins við Lifeline Health.
Spurt var hver sé kostnaður bæjarins við þennan samning og hvaða fjárheimild hafi verið til staðar vegna þessara útgjalda. Hver velji þá 80 bæjarstarfsmenn sem eigi að njóta þessarar þjónustu og hvernig verði það gert. Hver hafi séð um val á því fyrirtæki sem þjónustuna eigi að veita og hvort leitað hafi verið til fleiri aðila á þessum vettvangi, sem veiti sambærilega þjónustu. Spurt var loks hvort útboð hafi verið viðhaft og hvers vegna málið hafi ekki verið kynnt fyrir bæjarráði, sem sé ábyrgt fyrir starfsmannamálum bæjarins.
Fulltrúar Framsóknarflokks og Sjálfstæðisflokks sem eru í meirihluta höfnuðu því í bókun að samningur Hafnarfjarðarbæjar við Lifeline Health hafi verið gerður án kynningar eða umræðu innan bæjarins. Málið hafi verið kynnt á fundi bæjarráðs þann 5. febrúar síðastliðinn þegar mannauðsstjóri hafi lagt fram minnisblað um veikindahlutfall hjá Hafnarfjarðarbæ og þær aðgerðir sem fyrirhugaðar væru til að draga úr veikindum, styðja betur við starfsfólk og efla vellíðan á vinnustöðum bæjarins. Í þeirri kynningu hafi verið farið yfir 18 mánaða verkefnið Vellíðan í starfi, sem sé hluti af markvissri vinnu mannauðsteymisins til að bregðast við veikindahlutfalli og styrkja heilsu, starfsánægju og vellíðan starfsfólks. Innan þess verkefnis hafi m.a. verið kynnt þátttaka í þróunarverkefni með Lifeline Health.
5. febrúar
Í fundargerð fundar bæjarráðs 5. febrúar síðastliðinn er ekkert minnst á þennan samning en minnisblað mannauðsstjóra um veikindahlutfall starfsfólks fylgir með fundargerðinni undir dagskrárliðnum Mannauðsmál Hafnarfjarðarbæjar, fyrirspurnir, en um það segir í fundargerðinni:
„Lögð fram svör við fyrirspurn Samfylkingarinnar um fjarvistir starfsfólks hjá Hafnarfjarðarbæ,“ og í bókun þakka fulltrúar Samfylkingarinnar fyrir svörin.
Í minnisblaðinu er hins vegar ekkert minnst á þennan nýja samning við Lifeline Health. Um verkefnið Vellíðan í starfi, sem meirihlutinn vísaði til í svörum sínum nú í maí, segir að það yrði sett af stað í byrjun mars og væri 18 mánaða vegferð að bættri heilsu og betri líðan. Á stjórnendadegi 26. febrúar yrði verkefnið kynnt fyrir öllum stjórnendum Hafnarfjarðarbæjar. Stjórnendur myndu síðan kynna verkefnið á sínum vinnustöðum. Verkefnið væri samvinnuverkefni allra sem starfi hjá Hafnarfjarðarbæ og kynntur yrði aðgerðarpakki til að styðja við starfsfólk og stjórnendur.
Í minnisblaðinu eru síðan tiltekin átta atriði sem séu hluti af þessum aðgerðapakka og þar á meðal sé:
„Bjóða tveimur vinnustöðum upp á að taka þátt í tilraunaverkefni sem felst í ítarlegum heilsufarsmælingum og eftirfylgni í 12 mánuði, verkefnið verður unnið af læknum.“
Nánari upplýsingar um að gerður yrði sérstakur samningur um þetta tilraunaverkefni og hvað það myndi kosta bæinn var hins vegar ekki að finna í minnisblaðinu. Upplýsingar um umrædda lækna eða nafn tilraunaverkefnisins komu heldur ekki fram. Þegar minnisblaðið var lagt fram hafði þegar verið tilkynnt um samning Vestmannaeyjabæjar við Lifeline Health. Hvort að þjónustan hafi ekki verið nafngreind í minnisblaðinu vegna þess samningurinn hafi enn verið í vinnslu liggur ekki fyrir.
Heimild
Meirhluti bæjarráðs sagði enn fremur á fundi þess nú í vikunni að verkefnið væri innan fjárheimilda og kostnaður við það nemi 3.160.000 króna en samningurinn sé til eins árs. Um sé að ræða afmarkað þróunarverkefni sem falli að þeim áherslum sem þegar hafi verið kynntar bæjarráði og væru liður í ábyrgri mannauðsstefnu bæjarins. Markmiðið væri að draga úr veikindum, styðja við starfsfólk og skapa heilbrigðari vinnustaði. Það væri bæði mannúðlegt og fjárhagslega skynsamlegt að grípa fyrr inn í og leita nýrra leiða til að bæta líðan starfsfólks:
„Verkefnið Vellíðan í starfi var einnig kynnt öllum stjórnendum Hafnarfjarðarbæjar á stjórnendadegi í lok febrúar. Í kjölfarið gátu vinnustaðir óskað eftir þátttöku í Life line verkefninu. Nokkrir vinnustaðir sýndu því áhuga og mannauðsteymi bæjarins fór yfir þær umsóknir. Við val á þátttakendum var horft til þess að verkefnið næði til ólíkrar starfsemi bæjarins og hæfilegs fjölda starfsfólks en hámarksfjöldi þátttakenda er 80 manns. Hér er ekki um að ræða óvænta eða ókynnta ákvörðun, heldur eðlilegt framhald af vinnu sem þegar hefur verið kynnt bæjarráði og stjórnendum bæjarins. Undirritun samnings um framkvæmd verkefnisins átti því ekki að koma bæjarfulltrúum á óvart.“
Ekkert ákveðið
Fulltrúar Samfylkingarinnar lögðu fram gagnbókun þar sem þeir tóku ekki undir að samningurinn við Lifeline Health hefði verið kynntur með fullnægjandi hætti áður en gengið var frá honum:
„Í minnisblaði mannauðsstjóra voru ýmsar hugmyndir reifaðar, en engar ákvarðanir teknar. En að grípa svo til þess örfáum dögum fyrir kosningar, að undirlagi pólitískra fulltrúa í meirihluta, er í anda þess að um sýndarmennsku og yfirboð er að ræða. Málið er vanbúið og samningur við einkaaðila upp á 3 milljónir króna ósamþykktur og ókynntur í bæjarráði, sem ber ábyrgð á starfsmannamálum bæjarins. Starfsmenn bæjarins eru alls meira en tvö þúsund, en þetta verkefni nær aðeins til 80 starfsmanna. Ekki var leitað tilboða í verkefnið, ekki er sérstök fjárheimild til staðar og engin formleg samþykkt gerð um málið í bæjarráði. Og samningur við þjónustuaðila ekki undirritaður fyrr en fyrir nokkrum dögum. Heilsa og ánægja starfsmanna er mikilvægt mannauðsmál. Þau ber að taka alvarlega. Þau mál á ekki að setja á altari pólitískrar sýndarmennsku.“
