Fyrrverandi eiginkona Eiðs Smára Guðjohnsen, Ragnhildur Sveinsdóttir, hefur höfðað mál gegn honum fyrir Héraðsdómi Reykjavíkur. Málið er skráð sem skuldamál og verður tekið fyrir mánudaginn 2. nóvember.

Vilhjálmur H. Vilhjálmsson gætir hagsmuna Ragnhildar en Þorsteinn Einarsson fer með málið fyrir hönd Eiðs Smára.

Ekki liggja fyrir nánari upplýsingar um þá fjárkröfu sem deilt er um eða hversu háa fjárhæð Ragnhildur krefur fyrrverandi eiginmann sinn um. Af skráningu málsins hjá dómstólnum verður því ekki ráðið á þessu stigi hvað liggur að baki ágreiningi þeirra, annað en að málið er skilgreint sem skuldamál.

Ragnhildur hefur áður stefnt sínum fyrrverandi en Mannlíf fjallaði um málið árið 2022.

Voru lengi saman

Ragnhildur og Eiður Smári voru lengi saman og fylgdi hún honum á stórum hluta atvinnumannaferils hans í knattspyrnu. Ragnhildur ræddi samband þeirra og lífið erlendis í hlaðvarpinu Hæhæ fyrir skömmu.

Þar sagði hún meðal annars að hún hefði verið opin fyrir þeim miklu breytingum sem fylgdu ferli Eiðs og flutningum fjölskyldunnar milli landa.

„Ég held að ég hafi aldrei sagt nei við því sem var að gerast. Ég var opin fyrir öllu, bara að borgin og löndin væru örugg fyrir börnin,“ sagði Ragnhildur.

Hún rifjaði meðal annars upp flutning fjölskyldunnar frá London til Barcelona þegar Eiður gekk til liðs við spænska stórveldið Barcelona árið 2006.

Glæsilegur ferill

Eiður Smári á að baki einn glæsilegasta knattspyrnuferil íslensks leikmanns. Hann lék um árabil með Chelsea á Englandi og varð meðal annars tvívegis Englandsmeistari með félaginu.

Hann gekk til liðs við Barcelona árið 2006 og lék þar til ársins 2009. Á síðasta tímabili sínu hjá félaginu vann Barcelona spænska meistaratitilinn, spænska bikarinn og Meistaradeild Evrópu.

Eiður Smári lék jafnframt 88 A landsleiki fyrir Ísland og skoraði í þeim 26 mörk.