Eins og DV greindi frá í gær er útvarpsmaðurinn þjóðkunni Heimir Karlsson meðal frambjóðenda á nýjum framboðslista í Grímsnes – og Grafningshreppi. Þar sem 6 af 10 af frambjóðendum á listanum eru skráðir með ótilgreint heimilisfang var dregin sú ályktun að stofnað hafi verið til framboðsins aðallega vegna deilna við sveitarfélagið um rétt til að skrá lögheimili í húsum sem staðsett eru í frístundabyggðum. Oddviti framboðsins segir hins vegar þá ályktun vera ranga, framboðið snúist ekkert um þessar deilur heldur fyrst og fremst um að bæta sveitarfélagið, fá fram ný sjónarhorn í sveitarstjórn og hafa meira um það að segja hvernig hreppnum sé stjórnað.
Andrés Bertelsen er oddviti þessa framboðs, Betri sveit fyrir okkur öll sem hefur listabókstafinn Ö. Heimir Karlsson er hins vegar í sjöunda sæti á listanum.
Andrés segir í samtali við DV að framboðið snúist ekki að neinu leyti um umræddar deilur um skráningu lögheimila í frístundabyggðum í sveitarfélaginu en nokkuð hefur verið fjallað um þessar deilur í fjölmiðlum. Það sé ekkert um það raunar í stefnuskrá framboðsins. Bendir Andrés fréttamanni á að það sé ekki á valdi sveitarstjórna landsins að setja reglur um skráningu lögheimilis:
„Það væri hálf sturlað ef að framboðið ætti að snúast um eitthvað sem við getum ekki haft nein áhrif á.“
Ótilgreindir
Þeir íbúar í Grímsnes- og Grafningshreppi sem hafa viljað fá að skrá lögheimili sín í skilgreindum frístundabyggðum en ekki fengið það eru skráðir með ótilgreint heimilisfang.
Andrés, sem er sjálfur einn af þessum íbúum, segir þennan hóp vera um 20 prósent íbúa sveitarfélagsins. Þessi hópur hafi viljað hafa eitthvað að segja um hvernig fé sveitarfélagsins væri varið, hvernig komið væri fram við íbúa og hvernig staðið yrði að uppbyggingu sveitarfélagsins:
„Við erum klárlega stór hluti af samfélaginu.“
Hann segir þennan hóp hafa upplifað sig sem jaðarsettan innan sveitarfélagsins. Á framboðslistanum eru 10 manns en þar af eru 6 skráðir með ótilgreint heimilsfang en á hinum framboðslistanum í sveitarfélaginu, A-lista Framboðslista um öflugt samfélag í vaxandi sveitarfélagi, er enginn frambjóðandi með ótilgreint heimilisfang.
Andrés segir það benda til að ekki hafi verið áhugi hjá því af hálfu A-listans að fá einhvern úr hópi þeirra sem eru með ótilgreint heimilisfang til liðs við sig þrátt fyrir yfirlýsingar þess efnis að stefnt væri að því að fá til liðs við framboðið fólk úr hvaða hópi sem væri, sem hefði áhuga á að hafa áhrif á hvernig sveitarfélaginu sé stýrt.
„Upplifunin hefur svolítið verið að við séum bara kannski eins og ólöglegir innflytjendur eða eitthvað svoleiðis, sem er svolítið sturluð staðreynd. Við náttúrulega borgum fasteignaskatta og við borgum útsvar.“
Ekki miklar kröfur
Andrés segir þennan hóp þó ekki hafa gert miklar kröfur um bætta þjónustu sveitarfélagsins nema hvað að þau í hópnum sem eigi börn á grunnskólaaldri fái ekki skólaakstur frá sveitarfélaginu, fyrir börnin. Úr þessu verði að bæta:
„Okkur hefur fundist það hálf furðulegt.“
Þetta hafi hópurinn farið fram á að fá frá sveitarfélaginu en hins vegar ekki gert kröfur um að sorphirðu og snjómokstri við hús þeirra, sem eru með ótilgreind heimilisfön,g sé sinnt af hálfu sveitarfélagsins og það virðist því ekki vera raunin að það sé gert.
Andrés segir aðstæður barnanna skipta miklu meira máli fyrir frambjóðendur Ö-listans en skráning lögheimila. Hann minnir í þessu samhengi á ákvæði barnasáttmála Sameinuðu þjóðanna um jafnan rétt barna og jafnræðisreglu stjórnarskrárinnar.
Að hlusta
Andrés segir hvatann að framboðinu meðal annars hafa verið skort á samráði sveitarfélagsins við íbúa. Það hafi ekki verið hlustað á sjónarmið þeirra:
„Við viljum bara samtalið. Við viljum að réttur okkar sem íslenskir ríkisborgarar sé virtur. Það er nú lítið annað en það. Við erum ekkert að fara fram á meiri kröfur heldur en að horft sé til okkar og við séum spurð hvað okkur finnst.“
„Við förum í framboð af því við teljum okkur geta gert meira á öllum sviðum innan sveitarfélagsins.“
Andrés segir framjóðendur Ö-listans telja til að mynda að betur sé hægt að fara með fjármuni og innviði, stuðla betur að atvinnuuppbyggingu í sveitarfélaginu og fara betur með umhverfið með til að mynda bættri sorphirðu. Framboðið hafi lagt fram ítarlega stefnuskrá.
Hann bendir á að þróunin í litlum sveitarfélögum verði oft þannig að í sveitarstjórnum myndist ákveðinn bergmálshellir því þar veljist oft sama fólkið aftur og aftur til forystu. Á Ö-listanum sé hins vegar fólk með fjölbreytta reynslu og bakgrunn sem sumt hvert hafi ekki setið í sveitarstjórnum áður en þó sé þar fólk með reynslu af setu í sveitarstjórn á listanum og nefnir hann þar til sögunnar Rögnu Ívarsdóttur sem er í 2. sæti listans en hún hafi áður átt sæti í sveitarstjórn Hvalfjarðarsveitar. Á listanum séu frambjóðendur sem hafi reynslu af störfum utan sveitarfélagsins og það sé mikilvægt að fá fjölbreyttari sjónarhorn í sveitarstjórn Grímsnes- og Grafningshrepps.
Enn önnur leið til að fá fjölbreyttari frambjóðendahóp hafi verið sú að fá íbúa á Sólheimum til að taka sæti á listanum. Í Grímsnes- og Grafningshreppi sé hæsta hlutfall fatlaðra íbúa á landinu og fatlaðir einstaklingar séu best til þess fallnir að tala fyrir fatlaða. Umræddur frambjóðandi heitir Gunnlaugur Ingvarsson og er í fimmta sæti:
„Það þurfa allir að vera með rödd til að geta bætt og lagað sveitarfélagið,“ segir Andrés.
Málsvari
Andrés minnir á að framboðið vilji auka íbúalýðræði með því að íbúar séu spurðir í auknum mæli um t.d. hvernig eigi að ráðstafa framkvæmdafé sveitarfélagsins. Þetta sé hægt að gera með t.d. rafrænum atkvæðagreiðslum. Þetta eigi ekki að vera vandamál í ljósi góðrar fjárhagsstöðu sveitarfélagsins. Rekstrarniðurstaða A-hluta sveitarfélagsins, þ.e. sveitarsjóðsins sjálfs var jákvæð um 297,8 milljónir króna á síðasta ári en hlutfall skulda A- og B-hluta, af tekjum, var í árslok 39,2 prósent sem er langt undir hinu lögbundna 150 prósent hámarki.
Að lokum leggur Andrés áherslu á að framboð Betri sveitar fyrir okkur öll snúist ekki um skráningu lögheimila og ekki heldur fyrst og fremst um að bregðast við skorti á samráði við íbúa með ótilgreind heimilisföng, heldur að byggja upp sveitarfélagið og bæta það sem þurfi úrbóta við:
„Við teljum að við getum lagt okkar af mörkum til að gera sveitarfélagið betra. Það er númer eitt, tvö og þrjú.“
