Teiknimynd sem fjallar um sundferðir ungs innflytjenda á Íslandi og þörfina til félagslegra tengsla hlaut fyrstu verðlaun í flokki stuttmynda á virtri franskri kvikmyndahátíð á dögunum. Leikstjóri og handritshöfundur byggir söguþráð myndarinnar að hluta til á eigin reynslu.
„Myndin var frumsýnd í Annecy í Frakklandi, bara núna í júní og það var frábært af því að Annecy er stærsta animation-hátíð í heiminum,“ segir Fan Sissoko, kvikmyndagerðarkona.
Þarf að bíta á jaxlinn til að bráðna ekki ofan í sundlaugina
Fan Sissoko skrifaði handrit, teiknaði persónur og leikstýrði teiknimyndinni Sundruð sem hlaut á dögunum fyrstu verðlaun í flokki stuttmynda á hinni virtu hátíð Annecy Animation Festival í Frakklandi. Myndin fjallar um ungan innflytjanda á Íslandi sem upplifir félagslegt tengslaleysi í vikulegum sundferðum sínum. Hún þarf oft að bíta á jaxlinn til að hreinlega bráðna ekki ofan í sundlaugina. Fan ólst upp í Frakklandi, á franska móður og malískan föður. Hún hefur búið á Íslandi í sex ár og byggir sögu myndarinnar að hluta til á eigin reynslu. Myndin var framleidd með stuðningi Kvikmyndamiðstöðvar Íslands.
„Þessi tilfinning að þú sért ekki viss hvort þú megir vera hérna, hvort þú megir vera á staðnum af því að fólk lætur þig vita að þú sért kannski öðruvísi eða að þú tilheyrir ekki. Þetta er tilfinningin sem ég vildi kanna með myndinni,“ segir Fan Sissoko og bætir við að hún tengi oft við þá tilfinningu sjálf.
Fan segir teiknimyndina vera skáldsögu en að hún sé að einhverju leyti byggð á hennar eigin reynslu.
„Þetta er saga sem ég bjó til, ég er ekki karakterinn en það er mjög margt sem ég hef upplifað eða sem ég hef séð eða heyrt frá fólki sem ég setti inn hér.“
Hugmyndin kom í sundferð á Íslandi fyrir 20 árum
Fan fékk hugmyndina að staðsetningu sögunnar þegar hún kom fyrst til Íslands fyrir 20 árum og fór í Laugardalslaug.
„Ég var að synda og ég sá umhverfið speglast í vatninu á meðan ég var að synda og ég hugsaði að ef ég ætlaði að búa til teiknimynd ætti hún að gerast í sundi og að ég vildi hafa þetta móment í henni. Þetta voru svona fræin en þegar við fluttum hingað, það eru sex ár síðan, byrjaði ég að skrifa söguna og þetta þróaðist út frá því.“
„Við eigum öll jörðina saman“
Fan fannst mjög áhugavert að hafa sundlaugina sem samantekt af íslensku samfélagi og hafa svo utanaðkomandi sem koma inn í og sjá hvað gerist. Hún segir umhverfið vera fyndið og áhugavert en einnig fallegt.
„Með myndinni vildi ég segja að við erum öll fólk, við eigum öll jörðina saman og það meikar ekki sens fyrir mér að aðgreina hver má vera hér, hver má ekki vera hér, hver má tala, hver má ekki tala, hver má vera sýnileg, hver má ekki vera sýnileg. Við erum öll bara fólk sem erum að reyna að lifa lífinu okkar og þurfum að deila jörðinni. Við erum þar sem við erum bara fyrir tilviljun.“
