Páll Vilhjálmsson skrifar:

Ísland fær ekki undanþágur frá regluverki Evrópusambandsins. Þorgerður Katrín utanríkisráðherra reyndi að telja almenningi trú um að hollenski forsætisráðherrann hafi gefið ádrátt um undanþágur en varð að éta ofan í sig ósannindin.

Hvað er til bjargar málstað ESB-sinna? Jú, auðvitað Trump Bandaríkjaforseti.

Kristrún Frostadóttir forsætisráðherra, sem almennt talar ekki um þjóðaratvæði í þágu Viðreisnar, enda skammast hún sín fyrir mistökin, er mætt í hlaðvarp tveggja breskra ESB-sinna og segir Trump ástæðuna fyrir áhuga sumra Íslendinga á ESB-aðild.

Sigmar Guðmundsson þingmaður Viðreisnar fer að fordæmi formanns flokksins og leggur þingmanni Miðflokksins orð í munn. Tilgangurinn helgar meðalið hjá Sigmari og fetar hann þar í fótspor Þorgerðar Katrínar. Frá upplýsingaóreiðu um undanþágur er búin til samsæriskenning um Trumpista á Íslandi.

Bandaríkjaforseti er á níræðisaldri og lætur af embætti eftir rúm tvö ár. Í samhengi við umræðuna um mögulega ESB-aðild Íslands er forsetatíð Trump sagnfræði. Núverandi húsbóndi í Hvíta húsinu verður hættur stjórnmálavafstri, ef ekki genginn á vit feðra sinna, áður en Ísland verður ESB-ríki.

Bandaríkin verða aftur á sínum stað sem og öryggis- og varnarhagsmunir stórveldisins. Ísland er miðlægt á Norður-Atlantshafi. Herstöð á Íslandi er hornsteinn í þjóðaröryggi Bandaríkjanna. Yfirvöld í Washington munu aldrei láta gott heita að einstök Evrópuríki, eða ESB sem heild, sjái um bandaríska hernaðarhagsmuni á Íslandi. Ríki sem útvistar þjóðaröryggi sínu er ekki stórveldi.

Þær fraukur, Þorgerður Katrín og Kristrún, eru ólæsar á hegðun og hátterni stórvelda. Stórveldi falla leyfi þau andstæðingum að byggja upp hernaðarmátt í túnfæti sínum. Kúba gerði sig digra með sovéskum eldflaugum fyrir meira en sextíu árum og glímir enn við afleiðingarnar. Úkraína varð vestrænt verkfæri gegn Rússum og stendur frammi fyrir tortímingu, nánast í töluðum orðum.

Tvö fullveðja stórveldi eru í heiminum nú um stundir, Bandaríkin og Kína. Rússland gerir tilkall til að verða þriðja stórveldið og verður það, fari sem horfir í Úkraínu. Evrópusambandið hefur metnað til að verða stórveldi en á langt í land. ESB er efnahagsveldi en stendur hernaðarlega á brauðfótum.

Stöðutaka ESB á Íslandi riðlar valdajafnvægi á Norður-Atlantshafi. Létu Bandaríkin yfir sig ganga að Ísland yrði ESB-ríki myndu Kína og Rússland hafa það til marks um veikleika. Er eitt stórveldi sér veikleika hjá öðru er tækifærið gripið að skara eld að eigin köku. Raskist valdajafnvægi stórvelda verulega á skömmum tíma snareykst hættan á stríði. Þúkídídes skrifaði um hegðun og háttsemi stórvelda fyrir þrjú þúsund árum. Gríski höfundurinn er enn lesinn í herskólum um allan heim. Viðfangsefnið, valdajafnvægi stórvelda og staða smáríkja, er sígildur höfuðverkur sem fylgir alþjóðastjórnmálum. (Pelópskagastríðið er til á íslensku í þýðingu Sigurjóns Björnssonar. Einn þáttur ritsins, kenndur við Meley, segir af örlögum smáríkis í deilu Spörtu og Aþenu um forræðið á Eyjahafi.)

Af þessu má skilja að ekki er hagfellt Íslendingum að landið verði leiksoppur stórvelda. Já í ágústlok færi okkur nær bjargbrúninni. Nei er rétta svarið á kjörseðlinum.