Margir erlendir fjölmiðlar hafa gert niðurstöðu þjóðaratkvæðagreiðslunnar skil í morgun. Aðdragandinn er tíundaður og mögulegar afleiðingar. Fréttamenn Norska ríkisútvarpsins fylgdust grannt með framvindu mála í nótt, birtu tölur reglulega og greindu frá niðurstöðunni þegar hún lá fyrir.
Ríkisstjórn Jonasar Gahr Støre ætlar ekki að sækja um aðild að Evrópusambandinu á þessu kjörtímabili og möguleg innganga Íslands í sambandið hefði getað einangrað Noreg innan EES.
AFP-fréttaveitan segir niðurstöðuna hljóta að vera vonbrigði fyrir Evrópusambandið sem virtist reiðubúið til málamiðlana í erfiðum málum til að liðka fyrir inngöngu. Greinandi YLE segir úrslitin vera álitshnekki fyrir sambandið, meirihluti Íslendinga treysti því ekki nægilega eða telji hagsmunum ekki nægilega borgið innan þess.
Fullveldið, sjávarútvegur, landbúnaður og efnahagsmál ofarlega á blaði
Líklegt þyki að aðildarviðræður verði ekki á dagskrá hérlendis fyrr en hið fyrsta 2028. Flestir miðlar, þar á meðal BBC ogDR, fara yfir aðdragandann og segja að sjávarútvegsmál hafi ætíð verið meginfyrirstaðan að samkomulagi í viðræðum sem hófust 2009.
Greinandi DR rifjar upp að umsóknarferlið hófst 2009 þegar Ísland stóð höllum fæti eftir hrunið og veltir fyrir sér hvort endurnýjun viðræðna hefði orðið til þess að Norðmenn ákveddu að sækja um.
Stóra spurningin sé hvort Íslendingar sæki nokkurn tíma aftur um. Með aðild Íslands hefði meðal annars opnast hægara aðgengi að norðurslóðum en nú er. DR greinir frá togstreitu milli fylkinga og hótunum í garð utanríkisráðherra. Vitnað er í orð Kristrúnar Frostadóttur um að niðurstaðan hafi ekki áhrif á störf ríkisstjórnarinnar.
Færeyska kringvarpið hefur eftir henni von um að niðurstaðan valdi ekki klofningi meðal þjóðarinnar. Vitnað er í íslenska stjórnmálafræðinginn Siggu Blöndal að Íslendingum sé annt um sjávarútveginn, landbúnað, efnahagsmál og ekki síst sjálfstæði.
Margir miðlanna segja nei-sinna hafa viljað verja fullveldið og marga já-sinna hafa viljað leita skjóls í Evrópusambandinu af ugg yfir því að ásælni Bandaríkjaforseta hafi áhrif á Íslandi.
