Ágústa Johnson framkvæmdastjóri Hreyfingar skrifar um það í nýjum pistli á Smartlandi að sumt af því besta í lífinu komi eftir miðjan aldur. Hún nefnir betri sjálfsþekkingu og skýrari forgangsröðun.
Er fúlt að verða gamall? Það er vissulega betra en að verða það ekki. Gæti þriðja æviskeiðið jafnvel verið það besta?
Hvert æviskeið hefur sínar áskoranir og æ fleiri eru á þeirri skoðun að þriðja æviskeiðið sé á margan hátt það besta. Fyrstu 25 árin, ár lærdóms og þroska, næstu 25 árin; stofna margir heimili og fjölskyldu, sinna uppeldi og byggja upp starfsframann. Eftir það tekur gjarnan við stöðugleiki, frelsi og fólk veit hvað það vill og vill ekki og hefur e.t.v. meiri tíma fyrir áhugamál og ferðalög.
Er ekki kominnn tími til að hætta að lýsa yfir stríði gegn öldrun? Lítum heldur til þess að það að verða eldri er jákvætt, við erum nefnilega lifandi.
Svo er auðvitað stefnan að eldast vel, eldast af krafti, eldast á okkar eigin forsendum.
Viðhorf, viðhorf og aftur viðhorf
Rannsókn frá Yale-háskóla, sem fylgdi þátttakendum yfir langt tímabil, leiddi í ljós að fólk með jákvætt viðhorf til öldrunar lifði að meðaltali 7,5 árum lengur en þeir sem litu á öldrunina með neikvæðum augum. Sjö og hálft ár, 1277 dagar! Við vitum að hugurinn og líkaminn eru samofin. Trúin flytur fjöll. Trú og jákvætt viðhorf breytir miklu og kemur okkur langt.
Geislandi orka
Hefurðu veitt því athygli hvernig fólk sem geislar af orku og lífsgleði vekur eftirtekt annarra? Þá skiptir aldur ekki máli. Leyfum okkur að blómstra, sækjum okkur orku og hlúum vel að heilsunni, það mun skína í gegn langar leiðir, lífið verður betra, áhugaverðara og skemmtilegra.
Þetta snýst ekki um að reyna að vera yngri en við erum. Miklu frekar um það að rækta líkamlega og andlega heilsu og vera spriklandi af lífi einmitt á þeim aldri sem við erum á hverjum tíma.
Það er vel hægt að vinna stóra sigra á öllum aldri. Fjöldi rannsókna hafa t.d. sýnt með óyggjandi hætti að fólk á sextugsaldri sem byrjar að stunda reglulega styrktarþjálfun og þolþjálfun getur náð sambærilegum líkamlegar breytingum og yngra fólk. Líkaminn þekkir ekki staðalímyndina. Hann bregst við, og það er okkar að ákveða hvað og hvernig. Það er aldrei of seint að byrja.
Heilbrigð æviár alla ævi
Við lifum á tímum þar sem margir verða 90 - 100 ára og vísindin gefa okkur vísbendingu um að í framtíðinni verði lífslíkur fólks enn betri. En lífslengd er e.t.v. ekki svo heillandi ef við búum við mikinn heilsubrest síðustu 15-20 árin. Staðreyndin er sú að því miður upplifa það margir. Liggur ekki í augum uppi hve eftirsóknarvert er að koma sér upp lífstíl sem stuðlar að heilbrigðum æviárum alla ævi? Heilbrigð æviár, er sá tími sem við lifum við góða heilsu og góð lífsgæði, virk og sjálfbjarga. Munurinn á "að vera á lífi" og "að vera lifandi" getur verið gríðarlegur. Það sem er svo magnað, er að við sjálf getum haft geysilega mikil áhrif á hvoru megin við verðum. Ólíklega mun það gerast af sjálfu sér og það er öruggt að það getur enginn gert það fyrir þig.
Þetta er ekki flókið, aðeins ákvörðun og eftirfylgni
Markviss og regluleg syrktarþjálfun og fjölbreytt alhliða hreyfing, góður svefn, nærandi matur, góð félagstengsl og að hafa tilgang í tilverunni. Allt skiptir þetta sköpum. Við þurfum sannarlega ekki að leitast við að ná fullkomnun í öllu þessu alltaf. Það sem gildir er stöðug viðleitni við að sinna almennri heilsurækt, s.s. að leggja sig fram við að móta sér alla jafna heilbrigðar og góðar venjur sem skapa þann lífstíl sem mun stuðla að vellíðan og hreysti alla ævi.
Fimmtugt getur verið nýtt upphaf
Sumt af því besta í lífinu kemur eftir miðjan aldur. Betri sjálfsþekking. Skýrari forgangsröðun. Minni þörf á að sanna sig. Fólk sem er komið á fimmtugt og sextugt í dag er oft líkamlega og andlega á betri stað en sami aldurshópur var fyrir tveimur til þrem áratugum. Við vitum meira, höfum betri tækifæri og getum valið betur.
Við viljum eldast. Og við viljum eldast vel. Það er að stórum hluta undir okkur sjálfum komið. Allt hefur áhrif.
