Heiða Björg Hilmisdóttir borgarstjóri segir notkun sína á innkaupakorti sem hún hefur til umráða í störfum sínum eðlilega og í samræmi við reglur Reykjavíkurborgar. Eðlilegt sé að gerðar séu athugasemdir við færslurnar og óskað sé eftir fullnægjandi gögnum. „Og ég hef ekki upplifað neitt annað en að engar efasemdir séu um að ég sé að fara rétt með þetta kort. Það hefur aldrei komið upp nein umræða um það,“ bætir hún við.
Starfsfólk Reykjavíkurborgar hefur ítrekað gert athugasemdir við notkun Heiðu Bjargar á kortinu, bæði skriflegar og munnlegar. Óskað hefur verið eftir nánari skýringum á færslum og henni leiðbeint um rétta notkun á kortinu.
Mikið og virkt eftirlit með innkaupum
Heiða Björg hefur notað kortið fyrir 753 þúsund krónur síðan hún tók við embætti í febrúar í fyrra og notað það meðal annars til að greiða reikninga á veitingahúsum og fyrir leigubíla.
Hún segir athugasemdirnar hluta af ferli borgarinnar. Þær séu góðar og eðlilegar. Mikið eftirlit sé með öllum innkaupum og athugasemdirnar sýni einungis fram á að virkt eftirlit sé með innkaupum borgarstarfsmanna. Þá kannast hún ekki við að hafa ítrekað verið leiðbeint um rétta notkun á kortinu.
Borgarstarfsmenn gerðu 23 skriflegar athugasemdir við notkun Heiðu Bjargar á kortinu auk munnlegra athugasemda við þær 37 færslur sem eru skráðar á kortið frá því að hún tók við embætti. Hún segir athugasemdirnar fyrst og fremst hafa snúið að fylgigögnum sem vantaði og sér ekkert athugavert við fjölda þeirra.
„Nei, ég get ekki sagt ég sjái hvað er athugavert við það. Auðvitað væri gaman að maður gæti skilað öllu 100% inn þannig að allir aðilar vissu nákvæmlega hvað það væri sem væri verið að kaupa, en það er starfsmaður hér á skrifstofunni sem tekur saman þessar upplýsingar og sendir þær áfram, þær fara til fjármálasviðs og þar er aftur farið yfir þær. Mér finnst í sjálfu sér ekkert óeðlilegt að þá komi einhverjar spurningar eða athugasemdir og mér finnst sjálfsagt að svara þeim.“
Heiða Björg segist ekki hafa fengið athugasemdir um hvað hafi verið greitt fyrir með kortinu. „Ég hef fengið spurningar um tilefni. Það er eðlilegt. Þau þurfa að koma fram samhliða.“
Þá segir hún að ef upphæð fyrir flugmiða, sem hún greiddi fyrir með skömmum fyrirvara vegna verkfalls, er undanskilin, sé notkun hennar á kortinu sambærileg við notkun Einars Þorsteinssonar, forvera hennar í starfi.
Samkvæmt færsluyfirlitinu notaði Einar kortið aðallega til að greiða fyrir leigubílaferðir í störfum erlendis. Í einu tilviki var það notað til að greiða fyrir hótelgistingu í ferð á vegum borgarstjórnar þegar greiðsla hafði ekki borist frá skrifstofu borgarstjóra, samkvæmt upplýsingum frá Einari.
Endurgreiddi tvo reikninga í vikunni
Heiða Björg sagði í samtali við Morgunblaðið í gær að hún hefði endurgreitt tvo reikninga. Hún segir þá nú vera fjóra. Reikningana endurgreiddi hún vegna skorts á fylgiskjölum eða fullnægjandi reikningi. Þá greiddi hún fyrir leigubíl erlendis sem átti að greiða fyrir með dagpeningum.
Tveir reikningar voru endurgreiddir núna í vikunni, eftir að fjallað var um notkun borgarstjóra á kortinu. Aðspurð segir hún endurgreiðslurnar í vikunni ekki beint tengjast umfjöllun um málið. „Nei, ekki beint en auðvitað fórum við yfir þetta þegar við sáum þessar fréttir og við viljum hafa allt á hreinu og það er ekkert sem er ekki opinbert eða uppi á borðum um þetta.”
Eðlilegt að kaupa áfengi þegar tekið er á móti gestum
Strangar reglur eru um skil á reikningum í tengslum við notkun innkaupakorta Reykjavíkurborgar og samkvæmt þeim er ekki heimilt að kaupa áfengi nema að fenginni sérstakri heimild. Heiða Björg segist hafa keypt áfengi með kortinu og að heimild fyrir áfengiskaupum hafi legið fyrir í þau skipti sem það var gert. „Ég hef gert það í þeim tilfellum sem við erum að taka á móti gestum eða í tilfellum þar sem er einhver fundur þar sem slíkt er eðlilegt.
Á hvaða fundum er slíkt eðlilegt?
„Það er bara þegar borgarstjóri tekur á móti gestum eða heldur fundi í tengslum við móttökur eða annað slíkt.“
Hefurðu þá skýringar á því af hverju forverar þínir í starfi hafa ekki greitt fyrir veitingar á slíkum fundum með þessu korti?
„Þeir hafa bara frekar látið senda reikninga á borgina eða fengið endurgreitt eða eitthvað slíkt,“ segir Heiða
Nokkrar færslur eru frá veitingahúsum í borginni. Heiða segir borgarstjóra oftast taka á móti gestum í Ráðhúsinu en oft sé gott að fara með gesti út úr húsi, eins og hún hafi gert. Það hafi þó ekki verið oft.
Ekkert óeðlilegt við notkun kortsins og athugasemdir velkomnar
Heiða Björg segir allar athugasemdir við notkun kortsins velkomnar. „Það er ekkert óeðlilegt við það að borgarstjóri sé spurður út í það ef hann er að kaupa eitthvað á innkaupakorti og það er ekkert óeðlilegt við það að ég sé innt eftir að ég hef ekki skilað kvittun á réttum tíma eða ef ég hef ekki náð í betra gagn. Það er ekkert óeðlilegt við það.“
Og er ekkert óeðlilegt við notkun þína á kortinu?
„Nei, það er ekkert óeðlilegt og að mörgu leyti mun gagnsærra en að senda reikninga í bókhaldið og það er það sem Reykjavíkurborg vill, að það sé gagnsæi í viðskiptum og það sé hægt að rekja. Ég fékk leiðbeiningar hér um að gera þetta svona frá fyrsta degi og ég hef bara fylgt þeim.“
Fréttin hefur verið uppfærð með upplýsingum frá Einari Þorsteinssyni.
