Páll Steingrímsson, fyrrverandi skipstjóri hjá Samherja, var gestur í Spjallinu með Frosta Logasyni. Þar sagði Páll að hann muni halda áfram að leita svara í hinu svokallaða byrlunar- og símastuldsmáli og muni gera það þar til sannleikurinn komi að fullu í ljós.
Í viðtalinu fer Páll yfir reynslu sína af samskiptum við fjölmiðlafólk sem tengdist umfjöllun um málið, meðal annars Þóru Arnórsdóttur, fyrrverandi ritstjóra Kveiks, Helga Seljan og Kristinn Hrafnsson. Hann segist þó ekki vera í stríði við einstaklingana sjálfa.
„Ég er í stríði við vinnubrögð,“ segir Páll þegar hann er spurður hvort hann sé í stríði við blaðamennina. Hann segir jafnframt að hann hafi reynt að forðast að gera málið persónulegt.
Frosti lýsir því að hann eigi erfitt með að skilja af hverju ekki sé hægt að ræða málin opinskátt.
„Það er stundum eins og manni líði eins og skilnaðarbarni sem skilur ekki af hverju mamma og pabbi geta ekki talað saman,“ segir hann.
Páll segir að til að slíkt gæti gerst þurfi fólkið sem um ræðir að hætta að gera sig að fórnarlömbum vegna umfjöllunar um byrlunina sjálfa, þau hafi ekki átt aðild að henni og það þurfi ekki að ræða frekar.
Segir Þóru líklega ekki hafa vitað hvað gerðist í upphafi
Í viðtalinu er Páll spurður hvort hann telji að Þóra Arnórsdóttir hafi vitað að fyrrverandi eiginkona hans ætlaði að byrla honum ólyfjan og ná síma hans til að koma honum í hendur fjölmiðlafólks.
Páll svarar því neitandi.
„Ég held að Þóra Arnórsdóttir hafi ekki vitað hvað gerðist áður en hún fékk símann í hendurnar,“ segir hann.
Hann bætir þó við að á einhverjum tímapunkti hafi bæði Þóra og Helgi Seljan vitað að hann hefði verið lagður inn á spítala á meðan síminn var í umferð annars staðar. Að mati Páls sé það mögulega þyngsti bagginn sem Þóra beri í málinu.
„Að hafa ekki staldrað við á þeim tímapunkti og hugsað hvað gerðist.“
Segir engan illa innrættan
Þrátt fyrir harða gagnrýni á vinnubrögðin segir Páll að hann telji ekki að fólkið sem kom að málinu sé illt eða illa innrætt.
„Ég held að enginn í þessum hóp sé illur eða illa innrættur,“ segir hann og bætir við að mögulega hafi viðkomandi talið sig vera að vinna mikilvægt fréttamál eða „skúbb“.
Hann veltir þó fyrir sér af hverju RÚV hafi sjálft ekki birt fréttir upp úr efninu sem fékkst úr símanum.
„Það sem kemur mér á óvart er að RÚV birtir engar fréttir upp úr þessu.“
Páll og Frosti ræða svo hvort það hafi verið metið svo að ekki væri hægt að vinna efnið vegna þess hvernig það var fengið, eða að því hafi verið komið áfram til annarra miðla en Páll segir að með slíku tali séu þeir komnir út í þó nokkrar fabúleringar.
„Mun aldrei hætta“
Páll segir að hann muni halda áfram að leita svara, sama hversu mikla gagnrýni hann fær.
„Ég mun aldrei hætta fyrr en ég veit hvað kom fyrir,“ segir Páll og viðurkennir að það geti aðeins gerst ef fólkið sem á hlut að máli segi frá.
Hægt er að sjá brot úr viðtalinu hér fyrir neðan en ef þú vilt sjá allan þáttinn geturðu tryggt þér áskrift að Brotkast.is hérna.
