Maður sem brenndist illa á tæplega helmingi líkamans í aðgerðum lögreglu segir mikilvægt að lögreglumenn fái betri þjálfun í notkun rafbyssa. Maðurinn, sem hellti yfir sig bensíni, segir að kviknað hafi í sér út frá rafbyssuskoti.
„Mín viðbrögð voru bara: Haldið ykkur fjarri“
Maður sem brenndist illa á rúmlega helmingi líkamans í aðgerðum lögreglu segir mikilvægt að lögregla fái meiri þjálfun í notkun rafbyssa. Ótækt sé að beita slíku vopni þegar einstaklingur er ataður í eldsneyti. Hann hafnar staðhæfingum lögreglu um að hann hafi kveikt í sjálfum sér.
„Ég var þarna í kirkjugarðinum, á helgri jörð. Ég var að fara með bæn fyrir látna einstaklinga sem voru mér kærir og ég sé síðan lögreglumenn nálgast mig að aftan og framan og fer í panikk,“ segir Mikkael Ingiberg Gunnlaugsson.
Lögreglan hafði afskipti af Mikkael í Reykjanesbæ snemma morguns í maí eftir að hafa fengið tilkynningu um einstakling í ójafnvægi. Mikkael skilur ekki hvers vegna lögreglan kom í kirkjugarðinn.
„Mín viðbrögð voru bara haldið ykkur fjarri, hvað viljið þið og af hverju eruð þið á eftir mér?“
Mikkael hefur glímt við andleg veikindi. Hann var með kveikjara og brúsa með eldsneyti í vasanum sem hann segir að hafi verið ætlaðir vespunni hans.
„Ég fer úr buxunum og skvetti á mig bensíni til að láta þá bakka frá mér. Ég hélt að það myndi virka, en það hafði þveröfug áhrif. Þau gáfu bara meira í.“
Hvað gerist í kjölfarið?
„Svo tekur lögreglumaður eða kona upp teiser-byssu og skýtur mig. Ég finn hita koma upp bakið og svo er bara kviknað í mér. Ég bregst við með því að reyna að rúlla mér í jörðinni og reyna að slökkva eldinn. Og það sem mér finnst óhugnalegt er að þeir hafi ekki reynt að hjálpa til við að slökkva eldinn,“ segir Mikkael.
„Ég kveikti ekki í sjálfum mér“
Mikkael og lögreglunni ber ekki saman um atburði. Lögreglan segir að Mikkael hafi verið ógnandi og ekki farið að fyrirmælum. Hann hafi hellt yfir sig bensíni og hótað að kveikja í sér. Rafbyssu hafi þá verið beitt, sem hafi ekki borið árangur. Því næst hafi hann borið að sér eld.
Margrét Kristín Pálsdóttir, lögreglustjórinn á Suðurnesjum, segir ólíklegt að rafbyssan hafi orðið til þess að eldurinn kviknaði. Enginn hafi verið settur í leyfi vegna málsins.
„Ég hellti sjálfur yfir mig [bensíni] en ég kveikti ekki í sjálfum mér.“
segir Mikkael. Búkmyndavélar lögreglu staðfesti það.
„Í myndefninu kallar hún að ég sé með eldsneyti á mér, þessi lögreglukona sem mér heyrist, og svo stuttu síðar kemur smá pása. Svo stuttu síðar segir hún ég ætla að teisa hann og teisar mig. Og ég held að það hafi verið um það bil það leyti sem það kviknar í mér. Og ég var ekki að ógna þeim eða neitt.“
Brunaáverkarnir voru metnir það alvarlegir að Mikkael var fluttur með sjúkraflugi til Noregs. Hann var í lífshættu um tíma og haldið sofandi í þrjár vikur.
Átakanleg ferð á spítalann
Aron, systursonur Mikkaels, dvaldi með honum allan tímann í Noregi. Hann heyrði af atvikinu þegar Mikkael var kominn á Landspítalann.
„Þá var það náttúrulega beint út í bíl, en við erum búsett fyrir norðan, keyrt suður á gjörgæslu og ekki vitað hvort þetta var kveðjustund eða ekki. Og var í rauninni bara mjög átakanleg ferð suður. Vissi ekki, myndi maður ná og segja bæ, var þetta bæ?,“ segir Aron.
Og hvaða upplýsingar færðu þegar þú kemur til Reykjavíkur?
„Að hann er þungt haldinn. Hann er með bruna á yfir fimmtíu prósent líkamans og er haldið sofandi sökum bruna og óvíst með framhaldið.“
Mikkael var á spítala í fjórar vikur. Hann er með bruna á rúmlega fjörutíu og þremur prósentum líkamans. Aron, sem er sjúkraflutningamaður, segir langt bataferli fram undan.
„Hann verður alla ævi í sjúkraþjálfun. Verkjastilling og niðurtröppun af þessum verkjalyfjum tekur gríðarlega langan tíma og er gríðarlega erfitt ferli í sjálfu sér.“
Lögregla þurfi meiri þjálfun og skilning á rafbyssum
Málið er til rannsóknar hjá embætti héraðssaksóknara og nefnd um eftirlit með lögreglu.
Hvað myndir þú vilja sjá gerast í kjölfarið á þessu viðtali?
Ég myndi kalla eftir meiri þjálfun lögreglu og betri skilningi á vopnunum sem þeir nota. Því þetta eru sannarlega vopn. Þú skýtur ekki rafbyssuskotum í átt að manni sem er með brúsa af eldfimum vökva. Það er út í hött,“ segir Mikkael.
Aron tekur undir.
„Ég tel að allir vilji gera vel. Hvort rétt ákvörðun hafi verið tekin get ég ekki sagt til um. En mér finnst erfitt að réttlæta að beita einhvers konar blossa þegar það er einhver sem er ataður eldsneyti.“
Mikkael segist vona að viðtalið verði til góðs.
„Og veki almenning til umhugsunar um vald lögreglu og hvaða verkfærum hún fær að beita.“
