Héraðsdómur Reykjavíkur hefur dæmt Wenwei Zhang í tveggja og hálfs árs fangelsi fyrir nauðgun.
Hann var enn fremur dæmdur til að greiða konu tvær milljónir króna í miskabætur. Zhang og konan væru bæði ferðamenn á Íslandi.
Héraðssaksóknari gaf út ákæru á hendur Zhang í desember. Þar kom fram að hann væri ákærður fyrir nauðgun með því að hafa að morgni 1. janúar 2024 í svefnherbergi í íbúð í
Reykjavík, án samþykkis, haft samræði og önnur kynferðismök við konuna. Fram kom að hann hefði beitt hana ofbeldi og ólögmætri nauðung. Hann hefði endurtekið beðið hana um samræði, ýtt henni á rúmið, afklætt hana og haldið henni niðri og komið fram vilja sínum.
„Ákærði skeytti því engu þótt A ítrekaði með orðum og athöfnum að hún vildi þetta ekki og bæði hann um að láta af háttseminni og klóraði og klipi ákærða,“ segir í ákærunni.
Var vopnaður eggvopni
Fram kemur í dómi héraðsdóms, sem féll 2. júlí en var birtur í dag, að á nýársdagsmorgun 2024 hafi lögreglumenn verið sendir að íbúð í Reykjavík vegna manns sem væri vopnaður eggvopni og hefði veitt sér áverka.
Lögreglumenn vopnuðust og fengu liðsinni sérsveitar ríkislögreglustjóra vegna aðstæðna. Er inn var komið var maðurinn, sem reyndist vera Zhang, færður inn í herbergi innst í íbúðinni. Hann hafði skorið sig í handlegg með flökunarhníf og voru áverkar yfirborðskenndir. Auk hans var kona inni í íbúðinni sem sat á rúmi og reyndist þar vera um konuna að ræða.
Íbúðin mjög óþrifaleg
Íbúðin var mjög óþrifaleg og áfengisumbúðir lágu á víð og dreif. Í stofunni voru hjón
sem kváðust vera eigendur íbúðarinnar og sögðust þau hafa leigt hana út í skammtímaleigu í
gegnum AirBnb.
Lögreglumenn ræddu við viðstadda til að segja frá því hvað hefði átt sér stað í íbúðinni.
Konan kvaðst þekkja Zhang lítið en þau hefðu kynnst viku áður þegar hann hefði
verið fenginn til að aka fyrir hana og vinahóp hennar í ferð þeirra hingað til lands. Hópurinn hefði dvalið í íbúðinni.
Höfðu vinir konunnar farið af stað til Keflavíkurflugvallar um kl. 3 aðfaranótt nýársdags til að ná flugi og Zhang ekið þeim þangað. Hann hefði snúið aftur um tveimur tímum síðar og haft meðferðis áfengisflöskur. Hann hefði boðið henni áfengi og þau drukkið saman.
Skömmu síðar hefði hún ákveðið að fara að sofa en Zhang þá falast eftir kynlífi. Hún hefði hafnað því en hann þá ýtt henni á rúmið, afklætt hana gegn vilja hennar og nauðgað henni, að því er segir í dómi héraðsdóms.
Tók tvo hnífa þar sem hún óttaðist manninn
Konan kvaðst hafa reynt að fá Zhang til að hafa samband við lögreglu með sér. Hún hefði rætt við hann en tekið með sér tvo hnífa úr eldhúsinu þar sem hún hefði óttast hann.
Hún sagði að hann hefði ekki viljað samband við lögreglu og reynt að fá hana til að leysa málið með öðrum hætti. Hann hefði síðan tekið beitta hnífa úr eldhúsinu og farið að skaða sig með þeim. Konan hefði þá sent beiðni um aðstoð í gegnum leigusala íbúðarinnar sem komu á vettvang og hringdu í lögreglu.
Fram kemur í dómi héraðsdóms að Zhang hafi neitað sök. Hann hélt því fram að samræði hefði átt sér stað að frumkvæði konunnar og með fullu samþykki hennar.
Ótrúverðugar skýringar
Það er aftur á móti mat héraðsdóms að skýringar Zhang hafi verið ótrúverðugar og ekki í samræmi við gögn málsins. Lýsingar hans á atvikum í kjölfar brotsins og háttsemi hans bendi til þess að honum hafi verið fullljóst hvaða ásakanir konan bar á hann. Framburður hans verði því talinn ótrúverðugur og niðurstaða málsins verði ekki byggð á honum.
Framburður konunnar hafi hins vegar verið stöðugur og trúverðugur um þau atriði sem máli skipti. Framburður hennar hafi einnig fengið stoð í skýrslu neyðarmóttöku og framburði læknis og hjúkrunarfræðings sem sinntu konunni þar, þar sem greint sé frá andlegu ástandi hennar og marbletti sem læknirinn taldi geta samræmst frásögn hennar.
Þá kom fram í framburði leigusala íbúðarinnar að konan hefði verið í miklu uppnámi, neitað því að allt væri í lagi og óskað eftir aðkomu lögreglu. Þetta samræmist einnig hljóðupptöku af samtali hennar við neyðarlínuna, þar sem hún leitaði eftir aðstoð.
Gat ekki dulist að hann væri að þvinga konuna til samræðis
„Í samræmi við framangreint verður niðurstaða málsins byggð á trúverðugum framburði brotaþola sem fær stoð í gögnum málsins og framburði vitna. Er sannað að ákærði hafi viðhaft þá háttsemi sem greinir í ákæru, að undanskildu því að hafa endurtekið beðið brotaþola um samræði. Ekkert hefur komið fram sem styður framburð ákærða um að samþykki brotaþola hafi legið fyrir.
Samkvæmt framburði brotaþola greindi hún honum ítrekað frá því að hún vildi ekki stunda kynmök og reyndi að fá hann til að hætta með því að meiða hann. Staðfesta áverkar á ákærða þessa frásögn. Þá bendir marblettur á læri hennar til þess að ákærði hafi tekið fast á brotaþola. Með hliðsjón af framangreindu gat ákærða ekki dulist að hann var að þvinga brotaþola til samræðis,“ segir í niðurstöðukafla dómsins.
