Sorpa framleiðir bæði moltu og metangas úr lífrænum úrgangi. Við höfum skoðað að gera slíkt hið sama fyrir norðan en í dag er hér bara framleidd molta. Við teljum að það sé hagkvæmara að framleiða líka metangas úr lífrænum heimilisúrgangi og öðrum lífúrgangi sem fellur til, til dæmis í Eyjafirði,“ segir Ottó Elíasson framkvæmdastjóri Eims.
Eimur er verkefnadrifið samstarfsfélag á vegum orkufyrirtækja, ríkis og sveitar. Að því standa Landsvirkjun, Norðurorka og Orkuveita Húsavíkur auk samtaka sveitarfélaga á Norðurlandi eystra og vestra. Þetta er samstarfsvettvangur til þess að bæta nýtingu auðlinda.
„Við erum að vinna að verkefnum sem bæta nýtingu á einhverju sem við erum að sóa í dag.“
Eimur vinnur að því að breyta sóun í verðmæti á Norðurlandi.
Innleiðing sniglaræktunar sem sjálfbærrar aukabúgreinar á íslenskum sveitabæjum auk nýstárlegra nálgana í fráveitumálum er á meðal verkefna fyrirtækisins. Eitt stærsta verkefni þeirra snýr að því að fanga þann varma sem fer til spillis, jafnt í iðnaði sem og í hitaveitukerfum til sveita.
Aðspurður hvaða tækifæri felist í hitaveituhjárennsli segir Ottó sniglana vera tilraun í þeim málum. „Sniglar þurfa fyrst og fremst bara hita, raka og myrkur.“
Í verkefni um græna iðngarða á Bakka við Húsavík skoðaði Eimur hvernig væri mögulega hægt að nýta varma frá stóriðju í aðra ferla, þar á meðal hvernig væri hægt að byggja upp keðju, hringrásarhagkerfi, til að lágmarka umhverfisáhrif og jafnframt hámarka nýtingu auðlinda.
Um þessar mundir er Eimur þátttakandi í Icewater-verkefninu sem snýr að innleiðingu á vatnaáætlun á Íslandi undir stjórn Umhverfis- og orkustofnunar. Þar er sjónum beint að því hvernig hægt er að hreinsa fráveituvatn á mun hagkvæmari og skynsamlegri hátt en nú er gert. Að sögn Ottós uppfylla nánast engin sveitarfélög skyldur sínar í þeim efnum í dag.
„Okkar markmið er fyrst og síðast að sýna fólki, fyrirtækjum og sveitarfélögum hvernig á að hreinsa fráveituvatn betur en við erum að gera í dag. Við teljum að það séu bæði til ódýrari og hagkvæmari leiðir til þess.“
