Bandero, skip Paul Watson-samtakanna, hefur verið fært úr gömlu höfninni í Reykjavík í Akraneshöfn. Dráttarbátur Faxaflóahafna fylgdi skipinu á Akranes síðdegis í gær. Áhöfn Bandero kom á Íslandsmið í þeim tilgangi að bæði stöðva og vekja athygli á hvalveiðum.
Skipinu var aldrei ætlað að vera í gömlu höfninni til lengri tíma en Bandero var meðal annars flutt vegna komu átta herskipa í tengslum við tvíhliða varnaræfingu Íslands og Bandaríkjanna, Norður-Víking.
Þrjú herskip komu til hafnar í gær og fjögur í dag. Þá er eitt herskip væntanlegt á morgun. Eldar Ástþórsson, markaðs- og samskiptastjóri Faxaflóahafna, staðfestir þetta.
„Ekki hugsað sem langtímastæði fyrir Bandero“
Eftir að Landhelgisgæslan yfirtók Bandero 30. júlí var skipið fært til hafnar að Sundabakka. Það var gert að beiðni lögreglu þar sem höfnin er á lokuðu svæði. Bandero var síðan fært í gömlu höfnina og loks í gær í Akraneshöfn.
„Þetta er bara ráðstöfun vegna þess að það þurfa að koma fleiri skip inn í höfnina. Þetta var ekki hugsað sem langtímastæði fyrir Bandero og ekki núverandi staðsetning heldur,“ segir Eldar.
Vera Bandero í höfnum Reykjavíkur raskaði starfsemi ekki mikið.
„Þetta var ekkert mjög íþyngjandi fyrir okkur. Þetta er svona business as usual, að það séu að koma skip inn og út. Það er aðeins erfiðara þegar hann liggur óhreyfður í einhvern tíma en ég myndi ekkert segja að þetta sé svakalegt rask. Þetta er bara smá púsluspil – það koma skip inn og út og það verður að vera pláss fyrir alla.“
