Framkvæmdastjóri Bændasamtakanna segir bændur uggandi yfir innbrotum í svína- og hænsnabú á höfuðborgarsvæðinu og segir óboðlegt að bændur þurfi að líta um öxl og setja upp öryggiskerfi, haldi þessi þróun áfram.
Brotist var inn í Reykjabúið, hænsna- og kalkúnabú í Mosfellsbæ, aðfaranótt mánudags, fuglar bornir út og bréf skilið eftir. Svipað innbrot var í svínabú Stjörnugríss í maí.
„Það er alveg óhætt að segja að vissulega eru bændur mjög uggandi og hugsandi yfir þessu, ekki síst út frá dýravelferðinni. Þarna getur orðið gríðarlegur skaði og tjón, tilfinningalegt tjón. Svona hlutir eru aldrei gerðir undir merkjum dýravelferðar og það væri hræsni að halda einhverju öðru fram um það,“ sagði Margrét Ágústa Sigurðardóttir, framkvæmdastjóri Bændasamtakanna, í Morgunútvarpinu.
Margrét segir bændur ekki hafa orðið vara við neikvæða umræðu í samfélaginu um dýravelferð, enda sé dýravelferð í hávegum höfð á Íslandi.
„Við höfum mjög strangar reglur hérna heima og ítarlegri löggjöf og reglur en víðast hvar annars staðar,“ segir Margrét.
Hún kveðst ekki skilja hvers vegna Reykjabúið og Stjörnugrís hafi verið tekin út fyrir sviga í þessu samhengi.
„Þetta eru mjög vel rekin bú. Við sjáum það líka almennt hérna á Íslandi að sýklalyfjanotkun er í algjöru lágmarki. Það er mælanlegt viðmið á það hvað dýravelferðin er góð. Ef það er slæmur aðbúnaður dýra þá koma sýkingar frekar upp. Þarna er það ekki. Ég veit ekki hvað býr þarna að baki.“
Hægt er að hlusta á viðtalið við Margréti í heild hér í spilaranum.
