Kvikmyndin „Backrooms“, sem er kvikmyndaútgáfa af vinsælli YouTube-hryllingsþáttaröð, sló aðsóknarmet með því að þéna 81,5 milljónir dala í kvikmyndahúsum í Norður-Ameríku um helgina.
Leikstjóri myndarinnar, Kane Parsons, er aðeins tvítugur að aldri. Hann skapaði vefþáttaröðina „Backrooms“ á unglingsárum sínum.
Gríðarlegar tekjur myndarinnar um opnunarhelgina eru þær hæstu nokkru sinni fyrir frumsamda hryllingsmynd og meira en tvöfalda fyrra met kvikmyndaversins A24 fyrir opnun innanlands að sögn tímaritsins Variety.
Parsons verður einnig yngsti leikstjórinn til að ná fyrsta sæti með frumraun sinni í fullri lengd, að því er fagtímaritið greinir jafnframt frá.
Dularfullt hús
Chiwetel Ejiofor og norska leikkonan Renate Reinsve eru í aðalhlutverkum. Myndin fjallar um húsgagnaverslunareiganda, sem Ejiofor leikur, sem uppgötvar dularfullt völundarhús undir verslun sinni.
Þegar maðurinn hverfur fer sálfræðingur hans, sem er leikinn af Reinsve, inn í þetta millibilsrými til að reyna að finna hann.
Netþáttaröðin, sem hóf göngu sína árið 2022, varð hluti af fyrirbæri sem kallast „creepypasta“, sem er stutt hryllingssaga sem er endurbirt og breytt víðs vegar um netið, þar sem aðrir notendur bættu við smáatriðum eins og skrímslum og óuppgötvuðum víddum.
Annað sætið fór í hlut annarrar hryllingsmyndar, „Obsession“ frá Focus Features. Myndin, sem er í leikstjórn hins 26 ára Curry Baker, halaði inn 26,4 milljónum dala til viðbótar í miðasölu innanlands, að því er Exhibitor Relations greindi frá, og hefur nú náð áætluðum heildartekjum upp á nærri 150 milljónir dala á heimsvísu, en framleiðslukostnaður var innan við 1 milljón dala.
„Star Wars: The Mandalorian and Grogu“, nýjasta mynd Disney í hinum vinsæla vísindaskáldskaparsagnaflokki, hrapaði um nærri 70 prósent á annarri helgi sinni í kvikmyndahúsum, með 25 milljóna dala tekjur og endaði í þriðja sæti.
