Cole Tomas Allen sem handtekinn var um helgina í kjölfar skotárásar á hátíðarkvöldverð blaðamanna í Washington þar sem Donald Trump, forseti Bandaríkjanna var viðstaddur, kom fyrir alríkisdómstól fyrr í dag. Lagði saksóknari ákærur fram á hendur Allen, meðal annars fyrir tilraun til að myrða forsetann. Er Allen sagður hafa verið hvergi banginn fyrir dómi. Hann hafi svarað spurningum hátt og snjallt og lagt mikla áherslu á menntun sína.
Eins og fjallað hefur verið ítarlega umm reyndi Allen að komast inn í veislusal á Hilton-hótelinu í Washington. Þar fór fram hátíðarkvöldverður samtaka blaðamanna sem hafa það aðalstarf að fjalla um það sem gengur á í Hvíta húsinu, embættisbústað og skrifstofu forsetans, hverju sinni. Meðal viðstaddra voru Donald Trump forseti, J.D. Vance varaforseti, eiginkonur þeirra og ráðherrar úr ríkisstjórninni. Voru Trump, Vance, ráðherrar og makar fluttir á brott í skyndi þegar skothvellir heyrðust fyrir utan salinn.
Allen hafði hlaupið, vopnaður hnífum, skammbyssu og haglabyssu (nánar til tekið pumpu) í gegnum varðstöð inn í á hótelinu en lögreglumenn og fulltrúar úr lífvarðasveitinni (e. secret service) náðu að stöðva hann og yfirbuga áður en hann komst inn í salinn. Sá eini sem varð fyrir skoti var fulltrúi úr lífvarðasveitinni en skotið lenti í skotheldu vesti hans. Samkvæmt nýjustu fregnum er óvíst hvort að það skot kom úr byssu Allen eða vopnum löggæslumanna á vettvangi. Ekkert þeirra skota sem skotið var á hann hæfði Allen en hann datt á hlaupum og var í kjölfarið yfirbugaður.
Ákærður
Allen kom fyrir alríkisdómstól í Washington fyrr í dag og lagði saksóknari fram ákærur á hendur honum fyrir vopnalagabrot og fyrir tilraun til að myrða Trump forseta en fleiri ákærur gegn honum eru sagðar munu verða lagðar fram. Eftir því sem DV kemst næst þarf almennt fyrir alríkisdómstólum í Bandaríkjunum að fá samþykki ákærukviðdóms fyrir því að ákærur séu gefnar út en óvíst virðist hvort það á við í þessu tilfelli.
Dómari mun hafa spurt sakborninginn hvað hann héti og sagði Allen hátt og skýrt til nafns. Hann hefur ekki gefið upp afstöðu til þess hvort hann mun lýsa sig sekan eða saklausan. Allen var í bláum fangabúningi og handjárnaður. Hann tjáði dómaranum einnig að hann væri 31 árs gamall og bætti síðan við:
„Ég er með meistaragráðu.“
Þar var Allen ekki að fara með fleipur. Hann lauk meistaragráðu í tölvunarfræði frá California State University á síðasta ári en árið 2017 lauk hann grunnnámi í vélaverkfræði frá California Institute of Technology sem er einn virtasti háskóli heims.
Hvers vegna Allen finnst menntun sín skipta svona miklu máli í þessu samhengi er óljóst en hann sagði fyrir dómi að hann myndi svara öllum spurningum þegar þar að kæmi en fjölmiðlar vestanhafs greina frá því að hann hafi neitað að svara spurningum löggæslustofnanna en það er hans réttur, samkvæmt bandarískum lögum.
Hvað vildi hann?
Allen virðist því hvergi banginn og alls ekki niðurlútur eða skömmustulegur yfir þeirri alvarlegu ákæru sem lögð hefur verið fram á hendur honum.
Verði hann sakfelldur fyrir tilraun til að myrða forsetann á hann yfir höfði sér lífstíðarfangelsi.
Tíu mínútum áður en hann lét til skarar skríða sendi hann fjölskyldu sinni stefnuyfirlýsingu en strax í kjölfarið hafði bróðir hans samband við lögreglu. Sagðist hann ætla að myrða þá háttsettu aðila sem yrðu viðstaddir kvöldverðinn og skrifaði meðal annars:
„Ég er ekki lengur tilbúinn til að leyfa barnaníðingi, nauðgara og svikara að lita hendur mínar með glæpum sínum.“
Trump tók mjög illa í að vera spurður út í þessi orð í viðtali við fréttaskýringarþáttinn 60 mínútur en talið er að þessum orðum hafi verið beint að forsetanum. Sagði hann Allen vera veikan á geði en forsetinn hafði áður sagt að Allen hefði framið árásina af því hann hataði kristið fólk.
Hvað gerist næst?
Rannsókn á málinu stendur yfir og óvíst er hvenær réttarhöld yfir Allen munu hefjast. Til stendur að kanna hvort tilefni sé til að endurskoða skipulag öryggisgæslu á viðburðum þar sem Trump er viðstaddur. Hluti af þessari athugun er hvort að sjá eigi til þess framvegis að Trump og Vance verði ekki aftur viðstaddir sama viðburðinn eins og raunin var í þessu tilfelli.
Málið hefur einnig vakið enn á ný umræður um þá ofsafengnu og ofbeldisfullu orðræðu sem einkennt hefur samfélagsumræðuna vestanhafs. Trump og hans fólk, meðal annars Karoline Leavitt blaðafulltrúi forsetans og Todd Blanche starfandi dómsmálaráðherra, segja hatursfulla orðræðu Demókrata og fjölmiðla í garð forsetans hvetja fólk eins og Allen til að fremja slíkan verknað.
Hakeem Jeffries leiðtogi Demókrata í fulltrúadeild Bandaríkjaþings svaraði fullum hálsi og ráðlagði Leavitt og forsetanum að tóna niður þann ofsa og hatur sem einkennt hafi orðræðu Trump og hans fólks. Minnti hann á stuðning forsetans og hans stuðningsmanna við þá aðila sem réðust á þinghúsið 6. janúar 2021 og beittu meðal annars lögreglumenn miklu ofbeldi og reyndu að ná til Mike Pence þáverandi varaforseta, í þeim yfirlýsta tilgangi að drepa hann.
Jimmy Kimmel spjallþáttastjórnandi hefur einnig hlotið gagnrýni frá forsetanum fyrir sína orðræðu en þeir hafa löngum eldað grátt silfur saman. Í síðustu viku, fyrir árásina, sagði Kimmel að Melania Trump forstafrú væri að búast við því að verða ekkja. Á samfélagsmiðlum forsetafrúarinnar er orðræða Kimmel sögð vera ofbeldisfull og ekkert eiga skylt við grín.
Hafa Trump hjónin kallað eftir því að Kimmel verði rekinn úr starfi en hann hefur stýrt spjallþætti, sem sýndur er um allt land, á síðkvöldum á sjónarpsstöðinni ABC í nærri aldarfjórðung. Kimmel hefur aldrei farið leynt með andúð sína á Trump en forsetinn fékk ósk sína um að losna við Kimmel af skjánum uppfyllta tímabundið á síðasta ári eftir umdeild ummæli Kimmel um dauða áhrifavaldins og hægri sinnaða aktívistans Charlie Kirk, sem var mikill stuðningsmaður forsetans.
