Þrátt fyrir ríka viðleitni og vilja til samstarfs við eftirlitsaðila hefur svo farið að við eftirlit Skattsins með bifreiðaumboðum og bílasölum, að ávallt hafa verið gerðar athugasemdir við ferla, kerfi, þjálfun starfsmanna og framkvæmd í heimsóknum Skattsins.
Í kjölfarið hafi þessir aðilar sætt sektum. Fyrst sé þeim birt tilkynning um að til standi að leggja á þá nokkurra milljóna króna og jafnvel tuga milljóna króna stjórnvaldssekt, en samhliða sé þeim boðin 40–50% lækkun þeirrar áformuðu sektarfjárhæðar, gangist þeir við því að hafa brotið af sér og undirgangist sátt þess efnis.
Þetta kemur m.a. fram í erindi sem fern samtök í atvinnulífinu sendu dómsmálaráðherra í byrjun febrúar og Morgunblaðið hefur undir höndum, þar sem óskað var eftir fundi með ráðherranum vegna íþyngjandi séríslensks regluverks þegar lögleiddar voru aðgerðir gegn peningaþvætti og fjármögnun hryðjuverka. Telja samtökin það vera skýrt dæmi um gullhúðun Evrópureglna.
Ráðuneytið engu svarað
Það eru Samtök verslunar og þjónustu, Bílgreinasambandið, Félag atvinnurekenda og Samtök atvinnulífsins sem óskuðu eftir fundinum, en ráðherrann hefur ekki brugðist við óskinni og ráðuneytið engu svarað.
Segir í erindinu að öll bifreiðaumboð og bílasalar sem samtökunum sé kunnugt um hafi gert slíka sátt við Skattinn sem að framan er lýst. Er það gert vegna hættu á orðsporshnekki sem og til að ljúka málinu hratt og spara þannig fjármuni sem annars rynnu í háar sektargreiðslur og lögfræðikostnað. Fram kemur að slíkt ferli hafi eftirlitsstofnunin svo endurtekið síðar og það endað með nýrri sátt og nýrri stjórnvaldssekt.
Skatturinn finnur alltaf eitthvað að
Ólafur Stephensen, framkvæmdastjóri Félags atvinnurekenda, segir farir fyrirtækja ekki sléttar og afleita reynslu af Skattinum.
„Það er sama hvað menn leggja á sig til þess að mæta þessum óhóflegu kröfum sem á þá hafa verið lagðar, Skatturinn finnur alltaf eitthvað að og skellir stjórnvaldssektum á fyrirtækin í kjölfarið,“ segir hann.
Lesa má nánar um málið á bls. 4 í Morgunblaðinu í dag.
