Tæknirisarnir Meta, Google og TikTok gætu átt yfir höfði sér skatt í Ástralíu ef fyrirtækin semja ekki við ástralska fjölmiðla um að greiða fyrir birtingu á efni þeirra.
Frumvarp um skatt á tæknifyrirtækin er nú til meðferðar á ástralska þinginu. Stjórnvöld vilja að tæknirisarnir greiði fjölmiðlum fyrir birtingu og dreifingu á fréttum. Ef tæknifyrirtækin neita því ætla stjórnvöld að leggja 2,25% skatt á ástralskar tekjur fyrirtækjanna.
Frumvarpinu er ætlað að koma í veg fyrir að tæknirisarnir fjarlægi fréttir af samfélagsmiðlum sínum en bæði Meta og Google hafa gert það áður. Þau sem styðja frumvarpið halda því fram að samfélagsmiðlafyrirtækin laði að sér notendur með birtingu frétta og hagnist á auglýsingatekjum á netinu sem annars færu til fjölmiðla sem nú þegar búa við erfitt rekstrarumhverfi.
Samkvæmt Háskólanum í Canberra þá notar yfir helmingur Ástrala samfélagsmiðla sem fréttaveitu.
