Bill Ackman, einn þekktasti fjárfestir Bandaríkjanna, hefur svarað harðri gagnrýni Bernie Sanders á Elon Musk og segir að það sé ekki ástæða til að harma vaxandi auð Musk heldur þvert á móti að fagna þeim verðmætum sem hann hafi skapað.
Deilan hófst eftir að Sanders birti færslu á samfélagsmiðlinum X þar sem hann sagði að sú staðreynd að Musk væri á leiðinni að verða fyrsti billjónamæringur heims væri ekki tilefni til hátíðahalda heldur sönnun um fordæmalausan eigna- og tekjuójöfnuð í Bandaríkjunum.
Sanders hélt því fram að lýðræðið gæti ekki þrifist þegar einstaklingur sem lagði hundruð milljóna dollara í kosningabaráttu Donald Trump hefði orðið hundruðum milljarða dollara ríkari eftir kjör hans. Hann sagði jafnframt að auðjöfrar á borð við Musk væru að safna völdum á kostnað almennings.
Ackman hafnar þeirri sýn alfarið.
Segir SpaceX hafa breytt heiminum
Í svari sínu segir Ackman að auður Musk sé afleiðing þess að hann hafi skapað gríðarleg verðmæti fyrir samfélagið með fyrirtækjum sínum, sérstaklega SpaceX.
Hann bendir á að SpaceX hafi lækkað kostnað við geimskot verulega og byggt upp alþjóðlegt gervihnattanet sem veiti hundruðum milljóna manna aðgang að hraðvirku og ódýru interneti.
Samkvæmt Ackman muni þessi tækni stuðla að aukinni menntun, nýsköpun og atvinnusköpun víða um heim.
„Aðgangur að ódýrum og hraðvirkum samskiptum alls staðar mun gera börnum kleift að mennta sig, fjölskyldum að byggja upp fyrirtæki og lífsnauðsynlegri læknisþjónustu og þekkingu að ná til fólks um allan heim,“ skrifaði Ackman.
4.000 starfsmenn urðu milljónamæringar
Ackman bendir einnig á að um 4.000 starfsmenn SpaceX hafi orðið milljónamæringar vegna verðmætaaukningar fyrirtækisins, þar á meðal tímakaupsstarfsmenn.
Að hans mati sýni það að velgengni Musk hafi ekki aðeins komið honum sjálfum til góða heldur einnig þúsundum starfsmanna.
„Elon Musk situr ekki á billjón dollara haug af peningum, skartgripum og gulli,“ skrifaði Ackman.
Hann segir að auður Musk sé að mestu bundinn í eignarhlutum í fyrirtækjum á borð við SpaceX, Tesla, Neuralink og Boring Company og að hagnaðurinn sé endurfjárfestur í nýsköpun fremur en greiddur út sem arður.
Segir sósíalisma ekki geta skapað næsta SpaceX
Í lok færslunnar beinir Ackman spjótum sínum að hugmyndafræði Sanders.
„Bernie, sósíalisminn þinn hefði aldrei leyft SpaceX að verða til,“ skrifaði hann.
Ackman heldur því fram að sósíalískar hugmyndir hafi í gegnum tíðina leitt til fátæktar og stöðnunar, en að verkefni stjórnvalda eigi frekar að vera að skapa aðstæður þar sem fleiri frumkvöðlar geti byggt upp fyrirtæki á borð við SpaceX.
„Við þurfum að skapa aðstæður fyrir fleiri SpaceX-fyrirtæki, ekki ráðast á þá frumkvöðla sem hjálpa til við að þróa samfélagið áfram.“
.@BernieSanders , it is a time to celebrate. @elonmusk has created enormous value for society by building @SpaceX, driving down the cost of rocket launches and creating a global satellite communication network that has brought high speed, low-cost internet and communication… https://t.co/cXszxqi70T
— Bill Ackman (@BillAckman) June 13, 2026
