Kjörsókn í Reykjavík klukkan fimm var rúmlega 40% Það er rúmum þremur prósentustigum meira en hún var á sama tíma í sveitarstjórnarkosningunum 2022.
Kjörsókn er almennt meiri að þessu sinni en í síðustu kosningum í þeim sveitarfélögum sem fréttastofa hefur heyrt af.
Í Kópavogi höfðu ríflega 11 þúsund kosið klukkan fimm, eða 38%.
Á Akureyri voru 6149 búin að kjósa klukkan fimm, eða 41,2%.
Í Reykjanesbæ var kjörsókn klukkan fimm tæp 30%.
Í Múlaþingi var kjörsóknin klukkan fimm aðeins dræmari en í síðustu kosningum. Þá höfðu 1.616 kosið en á sama tíma í síðustu kosningum höfðu rúm 45% kosið.
Kosningavaka RÚV fer í loftið í sjónvarpinu klukkan 21.45 í kvöld, skömmu áður en kjörstaðir loka. Fyrstu tölur eru svo væntanlegar uppúr klukkan tíu.
Margir sérfræðingar og aðrir skemmtilegir gestir koma við í sjónvarpssal, en auk þess verður boðið upp á þá nýbreytni að Sýn og RÚV verða með sameiginlega útsendingu úr Ráðhúsi Reykjavíkur þegar fyrstu tölur úr borginni berast, líkleg uppúr miðnætti. Þar munu fréttamann stöðvanna ræða við oddvita framboðanna í beinni útsendingu.
Hólmfríður Dagný Friðjónsdóttir, ritstjóri kosningavökunnar á RÚV, segir að þetta verði hápunktur vökunnar sem enginn ætti að láta fram hjá sér fara.
Kjörsókn í Reykjavík klukkan 16 var 34,3%. Það er tæpum 2,5% meira en hún var í sveitarstjórnarkosningunum 2022 á sama tíma dags.
Í Kópavogi höfðu ríflega 10 þúsund kosið klukkan fjögur, eða 32,4%.
Á Akureyri höfðu 35,2 prósent kosið klukkan fjögur, alls 5.254.
Í Reykjanesbæ var kjörsókn klukkan fjögur 25,5%.
Á Akranesi höfðu 38,8% greitt atkvæði klukkan fjögur.
Í Garðabæ var kjörsókn klukkan fjögur 35,8%.
Silja Sóley Birgisdóttir, oddvidi Sósíalista í Reykjavík, kaus í Foldaskóla í Grafarvogi.
Ingimar Þór Friðriksson, oddviti framboðsins Góðan daginn í Reykjavík, greiddi atkvæði í Borgarskóla í Grafarvogi.
Einar Þorsteinsson, oddviti Framsóknarflokksins, kaus í Seljaskóla í morgun.
Ágúst Ólafsson fréttamaður er staddur í Múlaþingi þar sem hann tók kjósendur í sveitarfélaginu tali fyrir utan kjörstað. Flestir sem hann ræddi við var sammála um að valið hefði verið auðvelt og sögðust kjósa fólk frekar en flokka.
Það er betri kjörsókn í Múlaþingi það sem af er degi, en fyrir fjórum árum.
Kl. 14 höfðu 22,5% greitt atkvæði - 889 manns. Þetta var 21.5% á sama tíma 2022.
Starfsfólk á kjörstað á Svalbarðseyri brást skjótt við þegar athugasemd barst vegna veggspjalds sem beindi kjósendum á kjördeild.
Upphaflega spjaldið var appelsínugult, sem er einkennislitur eins framboðsins þriggja þar í bæ.
Nú er spjaldið hvítt og hlutlaust.
Kristinn Jón Ólafsson , oddviti Pírata í borginni, kaus í Breiðagerðisskóla ásamt Halldóru Mogensen, sambýliskonu sinni og fyrrverandi þingmanni Pírata.
Sigfús Aðalsteinsson, oddviti Okkar borgar, kaus í Álftamýrarskóla skömmu fyrir hádegi.
Næstum helmingur Grafarvogsbúa segist ætla að kjósa Sjálfstæðisflokkinn og 18% Miðflokkinn samkvæmt þjóðarpúlsi Gallups. Fylgi Samfylkingarinnar eykst eftir því sem vestar dregur í borginni.
Kjörsókn hefur verið með betra lagi víðast hvar um landið það sem af er degi.
Klukkan eitt höfðu 16,4% kosið í Reykjavík sem er einu og hálfu prósenti meira en á sama tíma í síðustu kosningum.
Á Akureyri höfðu tæplega sjö prósent kosið fyrir hádegi, eða 1.028, og stóðu kjósendur í röð þegar kjörfundur hófst.
Sömu sögu er að segja um Kópavog, þar voru á þriðja tug sem biðu spenntir eftir að ganga að kjörklefanum. Þar höfðu um 1.652 kosið klukkan ellefu, eða 5,3% af þeim sem eru á kjörskrá.
Á Akranesi hefur sömuleiðis gengið vel, þar eru 6.400 á kjörskrá og höfðu 787 atkvæði verið greidd fyrir hádegi, eða 12,5%.
Í Árborg höfðu 7,4% kosið klukkan ellefu, eða 709. Ingimundur Sigurmundsson, formaður yfirkjörstjórnar, segir kjörsókn á pari við síðustu sveitarstjórnarkosningar.
Í Hafnarfirði eru 24.587 á kjörskrá og höfðu 2.055 kosið fyrir hádegi, eða 8,3%.
Í Múlaþingi byrjaði kjörsókn frekar hægt að sögn Stefáns Þórs Haukssonar, formanns yfirkjörstjórnar. 15 prósent íbúa Fljótsdalshéraðs voru búnir að greiða atkvæði fyrir hádegi, en tæplega 400 kusu utan kjörfundar sem er ívið meira en áður segir Stefán.
Í Reykjanesbæ höfðu 581 kosið það sem af er degi, eða tæplega 3,4% af þeim sem eru á kjörskrá.
Jóna Hrefna Bergsteinsdóttir, formaður yfirkjörstjórnar, segir þetta aukningu frá því fyrir fjórum árum, upp á tæplega hálft prósent – en tæplega fimm þúsund fleiri eru á kjörskrá nú en fyrir síðustu sveitarstjórnarkosningar.
Rétt fyrir hádegi höfðu 321 kosið á kjörstað í Skagafirði sem er um 9.7% kjörsókn.
Hildur Björnsdóttir, oddviti Sjálfstæðisflokksins í Reykjavík, greiddi atkvæði sitt í Frostaskjóli í hádeginu. Hún mætti á kjörstað ásamt fjölskyldu sinni.
Á Svalbarðseyri við Eyjafjörð er 371 á kjörskrá og þrír flokkar í framboði.
Fólk var farið að tínast inn á kjörstað þegar fréttastofa leit þar við í morgun.
Á bílastæðinu hitti Siguróli Sigurðsson fréttamaður fyrir ungan athafnamann. Þar var Vakur Hrafn Plessy, nemandi í Valsárskóla, að selja kleinur til styrktar skólaferðalagi 9. og 10. bekkjar, en þau eru á leiðinni til Danmerkur.
Viðtökurnar létu ekki á sér standa og lagerinn seldist upp. Fréttamenn sögðu þær enda ljúffengar.
Gömul hefð er fyrir því að hringja bjöllum við upphaf kjörfundar í Breiðagerðisskóla í Reykjavík. Engin undantekning var á því í dag.
Björg Magnúsdóttir, oddviti Viðreisnar í Reykjavík, greiddi atkvæði í Breiðagerðisskóla ásamt manni sínum Tryggva Þór Hilmarssyni.
Einar Jóhannes Guðnason, oddviti Miðflokksins í Kópavogi kaus í Kórnum í dag.
Grýtubakkahreppur við Eyjafjörð er eitt af þeim sjö sveitarfélögum þar sem kosið er í óbundnum kosningum.
281 voru á kjörskrá, en 3 sögðu sig frá því að vera í kjöri, þannig eru 278 í kjöri í kosningum.
Þegar fréttastofa kom við á kjörstað í Grenivík klukkan 11 höfðu 26 greitt atkvæði. Að sögn starfsfólks fer kjörsókn rólega af stað í dag miðað við áður.
Jónas Már Torfason, oddviti Samfylkingarinnar í Kópavogi, mætti á kjörstað ásamt eiginkonu sinni Andreu Gestsdóttur og þremur dætrum þeirra. Hann greiddi atkvæði í Smáranum.
Kosningar eru í fullum gangi í Hafnarfirði, í Lækjarskjóla og á Ásvöllum.
Karólína Helga Símonardóttir, oddviti Viðreisnar í Hafnarfirði, fór í þjóðbúning og greiddi atkvæði í Lækjarskóla.
Ari Edwald, oddviti Miðflokksins í Reykjavík, er búinn að greiða atkvæði. Líkt og Guðmundur Ingi kaus Ari í Ráðhúsi Reykjavíkur.
Guðmundur Ingi Þóroddsson, oddviti Flokks fólksins í Reykjavík, er búinn að kjósa. Hann greiddi atkvæði í Ráðhúsi Reykjavíkur.
Gylfi Þór Þorsteinsson, oddiviti Viðreisnar í Mosfellsbæ, greiddi atkvæði í Lágafellskóla í morgun.
Um 40 manns biðu þess að fá að kjósa fyrir utan Verkmenntaskólann á Akureyri þegar kjörstaðir opnuðu í morgun.
Helga Eymundsdóttir, formaður yfirkjörstjórnar á Akureyri, segir að þar hafi allt farið vel af stað.
„Hér var starfsfólk mætt í vinnu klukkan hálf átta, þau fengu sér smá kaffisopa og smá næringu. Síðan var farið með alla atkvæðaseðla inn í kjördeildir korter yfir átta.
Næst var labbaður hringur og allir kassar innsiglaðir í votta viðurvist og þá voru mættir hér umboðsmenn frá flest öllum framboðum. Síðan opnuðum við strax klukkan níu og það var strax komið fólk hingað þegar að við opnuðum.“
Atkvæðagreiðslan heldur áfram í Vesturbæ Reykjavíkur.
Pétur Marteinsson, oddviti Samfylkingarinnar í Reykjavík, greiddi atkvæði í KR-heimilinu í Frostaskjóli.
Nú þegar kjörstaðir eru opnir fer fólk að týnast inn. Sígilt stef á kjördegi er að smella af myndum af frambjóðendum að greiða atkvæði.
Sanna Magdalena Mörtudóttir, oddviti Vinstrisins í Reykjavík, mætti í Vesturbæjarskóla til að kjósa.
Margvísleg málefni eru kjósendum hugleikin fyrir kjördag og oft úr vöndu að ráða þegar í kjörklefann er komið.
Fréttastofa fór um landið síðustu vikur og ræddi við oddvita framboðslista í fjölmennustu sveitarfélögunum og má sjá þá þætti hér: Oddvitaumræður.
Þá hafa margir mátað sig við framboð í sínum heimabæjum í kosningaprófi RÚV sem má nálgast hér:
Hér að neðan má finna ýmsar hagnýtar upplýsingar um kosningarnar.
Gleðilegan kjördag!
Í dag verður gengið að kjörborðinu margfræga í sveitarfélögum landsins. Víðast hvar voru kjörstaðir opnaðir klukkan níu og verður lokað klukkan tíu í kvöld.
Fréttastofa RÚV stendur vaktina um allt land og færir ykkur nýjustu fréttir af framvindu mála hér í þessari fréttavakt, sem og öllum okkar miðlum.
Kosningavakan fer í loftið í sjónvarpinu klukkan 21.45 í kvöld og má búast við fyrstu tölum fljótlega eftir að kjörstöðum verður lokað.
