Átján forstjórar og framámenn í íslensku atvinnulífi hafa sent stjórnvöldum bréf þar sem kallað er eftir aukinni hagsmunagæslu af hálfu Íslands gagnvart þróun ETS-kerfisins. Þeir vilja að í stað tímabundinna undanþága verði fundin varanleg lausn sem taki mið af legu landsins og fjarlægð frá mörkuðum. Forsætisráðherra segist vongóð um að Ísland fái áframhaldandi undanþágu frá kerfinu í flugi.
Í óundirbúnum fyrirspurnartíma á Alþingi í morgun sagði Sigmundur Davíð Gunnlaugsson, formaður Miðflokksins, aðstæður í íslensku efnahagslífi kalla á inngrip af hálfu stjórnvalda og meðal annars þurfi að bregðast við erfiðri stöðu Icelandair. Ein leið væri að Ísland falli frá innleiðingu ETS-kerfisins en Ísland fékk undanþágu frá kerfinu út þetta ár. „Ein leið til þess að bregðast við með afgerandi hætti væri að bregðast við þeirri stöðu sem Icelandair er statt í núna. Það flugfélag er ekki bara eins og hvert annað fyrirtæki; það er á vissan hátt líflína landsins við útlönd.“
Kristrún Frostadóttir, forsætisráðherra, sagði að íslensk stjónvöld hafi ítrekað bent á sérstöðu Íslands innan kerfisins í samtölum við Evrópusambandið og að sá málflutningur njóti skilnings. „Það er unnið að því alla daga að halda því til haga hver sérstaða Íslands er og sú barátta er enn í gangi. Við höfum fengið ágætis hljómgrunn fyrir því gagnvart Evrópusambandinu. Það eru allir meðvitaðir um að það þarf að halda sérstöðu Íslands á lofti hvað það varðar og það gerum við daglega gagnvart Evrópusambandinu.“
Vilja varanlegri lausnir
Hópur forstjóra og framámanna í íslensku viðskiptalífi hefur sent stjórnvöldum áskorun þar sem farið er fram á að Ísland beiti sér af meira afli í viðræðum um ETS-kerfið í Brussel. Bréfið undirrita meðal annars forstjórar Icelandair, Festi, Eimskips, Marels, Landsvirkjunar auk framkvæmdastjóra Samtaka atvinnulífsins og stjórnarformanns Festu, miðstöðvar um sjálfbærni.
Áskorun þeirra til stjórnvalda er þríþætt: að Ísland efli hagsmunagæslu á evrópskum vettvangi, að fundin verði varanleg lausn sem taki mið af legu Íslands í stað tímabundinna undanþága og að stjórnvöld tryggi aðgengi að upplýsingum og auki gagnsæi um tekjur ríkisins af ETS-losunarheimildum og hvernig þær nýtast í loftslagsverkefni.
