Umhverfis- og orkustofnun veitti Orkubúi Vestfjarða virkjanaleyfi fyrir 9,9 MW Kvíslatunguvirkjun í byrjun júlí. Engar athugasemdir bárust áður en kærufrestur rann út. Einnig veitti stofnunin heimild til breytinga á vatnshlotum Svartagilsvatns, Efri-Kotvatna og Þjóðbrókargils.
„Um er að ræða stóran áfanga í eflingu raforkukerfisins á Vestfjörðum ekki síst út frá afhendingaröryggi raforku í Strandabyggð og á Ströndum, en með virkjuninni er tryggð afhending á raforku úr tveimur áttum fyrir Hólmavík og nágrenni,“ segir í tilkynningu frá Orkubúi Vestfjarða.
Með tilkomu virkjunarinnar eykst árleg framleiðslugeta Orkubús Vestfjarða um 67%. Afl virkjunarinnar nægir til að anna tvöföldu hámarksálagi landshlutans. Hún gæti því annað raforkuþörf í Strandabyggð og Ísafjarðardjúpi svo vikum skiptir ef upp kæmi alvarleg bilun í flutningskerfi raforku, að því er segir í tilkynningunni.
Stefnt að gangsetningu í september 2028
Undirbúningsframkvæmdir eru þegar hafnar og unnið hefur verið markvisst að hönnun hennar. Stefnt er að því að aðalútboð vegna virkjunarframkvæmdanna sjálfra fari fram í næsta mánuði. Unnið er að undirbúningi umsóknar um framkvæmdaleyfi fyrir virkjunina. Hún er komin á aðalskipulag Strandabyggðar.
Áætlanir gera ráð fyrir að hægt verði að ræsa virkjunina í september 2028. Gert er ráð fyrir að frágangi á virkjunarsvæðinu ljúki 2029. Þegar sótt var um leyfið í apríl í fyrra var áætlaður kostnaður við byggingu virkjunarinnar ríflega sjö milljarðar króna.
