Hörður Lilliendahl, varðstjóri í umferðadeild Lögreglunnar á höfuðborgarsvæðinu, segir lögreglu gera sitt besta til að sporna við hraðaakstri. Ungt fólk og umferðin er yfirskrift umferðarþings Samgöngustofu sem fram fór í dag. Sérfræðingar frá lögreglu, Samgöngustofu og Háskóla Íslands ræddu þar hvernig stuðla mætti að ábyrgri þátttöku ungmenna í umferðinni.
Mikil umræða hefur verið um hraðaakstur ungmenna eftir að fjögur ungmenni létust í tveimur slysum á þessu ári.
„Við fáum náttúrulega tilkynningar um að krakkarnir séu að hittast á einhverjum ákveðnum stöðum og jafnvel að spyrna,“ segir Hörður.
„Þá reynum við að bregðast við og látum sjá okkur á svæðinu og þá náttúrulega erum við búin að eyðileggja þennan stað. En þá færa þau sig náttúrulega á einhvern annan stað og við getum ekki haldið endalaust í hendurnar á þeim og við erum ekki nógu margir til að vera allsstaðar. Þannig að þau náttúrulega finna sér leiðir til að gera þetta, en þetta er hættulegt.“
Tímaspursmál hvenær alvarlegt slys verður vegna rafmagnskrossara
Hörður segir tilkomu svokallaðra rafmagnskrossara eina helstu breytinguna hjá ungmennum í umferðinni í dag. Þeir eru auglýstir sem vélhjól sem takmarkast við 25 kílómetra hraða. Auðvelt sé að eiga við hjólin svo þau komist hraðar.
„En þessi hjól þegar búið er að breyta þeim þá eru þau stórhættuleg, þau komast allt of hratt og eru bara stórhættuleg fyrir krakkana og gangandi vegfarendur,“ segir Hörður.
„Þannig að þetta er eiginlega bara tímaspursmál hvenær verður alvarlegt slys á svona hjóli.“
Mikilvægt að tala ekki niður til ungs fólks
Ungmenni á ólíkum aldri komu einnig fram á þinginu og deildu sinni reynslu, þar á meðal Eva Steinsen, framhaldsskólanemi. „Ég var að tala um hvernig það er að vera 18 ára í umferðinni og hvernig við upplifum umferðina sem ungmenni, kannski nýkomin með bílpróf,“ segir hún.
„Ég var líka að leggja áherslu á hvernig fullorðið fólk getur náð til okkar,“ segir Eva sem telur mikilvægt að ekki sé talað niður til ungs fólks. Auðvelt sé að ná til þess í gegnum samfélagsmiðla.
„Við erum náttúrulega á samfélagsmiðlum í daglegu lífi þannig að það er allavega eitt sem fólk getur gert,“ segir Eva sem telur reynslusögur fullorðinna geta haft mikil áhrif.
„Bara að segja frá sinni reynslu ef þau hafa lent í einhverju og segja hvernig þeim leið,“ segir hún.
Varkárari í dag en þegar hann fékk prófið
Kristinn Örn Gunnarsson háskólanemi talaði einnig á þinginu. Hann sagði reynslu sína í umferðinni hafa breytt viðhorfum sínum.
„Þegar ég var með bílpróf fyrst og var að byrja að keyra þá upplifði ég mig öruggari vegna þess að ég áttaði mig ekki alveg á afleiðingunum,“ segir hann.
„Núna í dag er ég miklu meira meðvitaður um hvernig ég haga mér í umferðinni og verð með því kannski aðeins stressaðri en svona heilt yfir myndi ég nú samt segja að það geri mig að betri bílstjóra en ég var fyrir þremur árum.“
Ráðherra segir hraðakstur ekki eiga heima í umferðinni
Hraðakstur á ekki heima í umferðinni að mati Eyjólfs Ármannssonar innviðaráðherra. Hann tekur vel í hugmynd Willum Þórs Þórsson, forseta Íþrótta- og ólympíusambands Íslands, sem vill taka ofsaakstur af götunum og inn í öryggi akstursíþróttafélaga.
„Ég tel að þetta sé áhugaverð tillaga og gæti verið góð forvörn,“ segir Eyjólfur.
Eyjólfur tekur undir með Willum að með því að auka aðgengi ungs fólks að íþróttinni sé hægt að vinna að forvörnum tengdum hraðakstri.
„Fólk sem hefur áhuga á að keyra hratt fái þá útrás fyrir það í sinni íþrótt, þá þarf að skapa aðstöðu fyrir það“
„En þetta á alls ekki heima með nokkrum hætti nálægt umferðinni.“
