„Jakob æfir körfubolta með Haukum SO og fótbolta með Stjörnunni Ösp. Hann var einn af þremur börnum sem mættu á fyrstu æfinguna hjá Haukum SO. Nú er hann búinn að æfa í 9 ár. Hann byrjaði í sundi með Firði sundfélagi fyrir fatlaða en sundíþróttin náði ekki að fanga áhuga hans. Hann hafði alltaf mikinn áhuga á hópíþróttum en möguleikarnir voru litlir sem engir, sem var erfitt fyrir sex ára,“ segir Fjóla.
Þau foreldrarnir hafi skoðað ýmsar íþróttir en æfingar fyrir fatlaða voru ekki hluti af starfi félaganna. Drengnum þeirra stóð til boða að æfa fótbolta hjá FH en þau sáu fram á að fljótlega kæmi að því að hann næði ekki að fylgja hinum krökkunum eftir.
„Ég hafði heyrt þetta úr öðrum íþróttum, til dæmis fimleikunum þar sem gekk vel í barnahópunum en þegar krakkarnir voru komnir á þann aldur að foreldrar voru ekki lengur með í salnum á æfingum, þá var enginn annar stuðningur í boði fyrir fatlaða og þau þurftu að hætta.
Við vildum ekki að Jakob byrjaði að æfa íþrótt sem hann myndi elska og svo þyrftum við að taka hann úr henni. Það er ótrúlega mikilvægt að fá að upplifa að vera hluti af liði.
Þá er árangurinn ekki bara háður því hvernig þér gengur heldur vinna allir saman á jafningjagrundvelli, félagsskapurinn sem myndast er ómetanlegur,“ segir Fjóla.
Viðhorf foreldra geti hindrað
„Vissulega spilar líka inn í hvernig viðhorf okkar sjálfra er. Til dæmis það að við þorðum ekki að setja Jakob í fótbolta því við óttuðumst tímapunktinn þegar þyrfti að taka hann út. Kannski vorum við stærsta hindrunin. En við erum ánægð með möguleikana sem hann hefur úr að velja í dag og honum líður vel á æfingum. Honum er tekið sem jafningja og hefur eignast vini bæði í körfuboltanum og fótboltanum, félagslegi þátturinn er svo stór.“
í spilaranum hér fyrir neðan má heyra sögur foreldra og barna með fötlun af reynslu sinni af skipulögðu íþróttastarfi og mikilvægi þess að öll börn fái tækifæri til að vera með.
Fyrst mættu þrír en nú kominn meistaraflokkur
Fjóla segir starfið hjá Haukum SO hafa vaxið gríðarlega frá því að þau mættu á fyrstu æfinguna, ásamt tveimur öðrum krökkum. Sonur hennar muni því geta stundað sína uppáhalds íþrótt áfram.
„Jakob er að verða 15 ára og æfir með eldri hóp í körfuboltanum og nú er líka kominn meistaraflokkur. Það sem byrjaði með 3 börnum er orðið að gríðarlegu starfi og það er eins með fótboltann hjá Stjörnunni Ösp," segir Fjóla, Jakob geti haldið áfram að æfa sínar íþróttir og muni gera það.
„Þetta snýst um að fá tækifærin til að blómstra og finna hvar áhuginn er og hverju maður hefur gaman af og fá tækifæri til þess. Þetta á að vera sjálfssagður hlutur fyrir alla krakka.“
Tímasetningarnar skipta líka máli, eins og Hörður Reynir Þórðarson, þjálfari Stjörnunnar Aspar benti á hér á Vísi þá þurfa æfingarnar að fara fram á þeim tíma sem foreldrar geta skutlað krökkunum.
„Ég sendi til dæmis minn strák ekki einan, hann þarf fylgd og aðstoð og þá þurfa æfingarnar að vera á tíma þar sem hægt er að senda fylgdarmanneskju með. Sem er helst eftir kl 17 á virkum dögum og svo um helgar. En við erum líka mjög heppin með að geta labbað á körfuboltaæfingar en keyrum í Garðabæinn í fótboltann. Margir þurfa að fara langt á æfingar og það tekur tíma. Þess vegna vildi ég óska að hverfisfélögin myndu bjóða upp á þetta starf.“
Krakkarnir vilja keppa
„Ef fleiri félög bjóða uppá æfingar fyrir alla þá skapast möguleikarnir á því að vera með mót þar sem liðin mætast. Því eins og í öllum hópíþróttum þá langar þessa krakka líka til að keppa. Eins og staðan er í dag þá þarf helst að leita út fyrir landsteinana til að komast á mót og höfum við gert það með báðum félögum.“
Það þarf ekki sérþjálfun til að þjálfa börn með fötlun eða kunna sérstaklega að tala við fatlaða einstaklinga.
„Þetta er til dæmis gott tækifæri fyrir félögin til að nýta fólkið úr yngri flokkunum til að þjálfa. Það eru til dæmis gríðarlega flottir aðstoðarþjálfarar hjá Haukum SO sem og hjá Stjarnan Ösp sem standa sig svo vel, þetta eru eldri krakkar í grunnskóla eða framhaldsskólakrakkar og jafnaldrar margra þeirra sem eru að æfa. Þannig verður þjálfunin oft líka meira á jafningjagrundvelli og krakkarnir sem taka að sér þjálfun fá reynslu sem mun nýtast þeim vel í lífinu. Það þarf ekki sérstaka aðstöðu eða sérstaka þekkingu, bara viljann.“
Allir með vinnur að því að fjölga tækifærum barna með fötlun til að stunda íþróttir í sínu nærumhverfi. Starfsfólk Allir með veitir íþróttafélögum og þjálfurum fræðslu og fjárstuðning til að stíga skrefið og bjóða upp á starf fyrir börn með fötlun. Íþróttir eru fyrir öll börn. Meira um verkefnið á allirmed.is
