Dýraverndarsamband Íslands, dýraverndunarfélögin Villikettir og Dýrfinna skora á stjórnvöld að vinna að því að draga úr innflutningi og sölu á frostlegi sem inniheldur etýlenglýkól og að settar verði skýrari reglur um öryggi slíkra vara.
Reglulega hefur verið eitrað fyrir dýrum víða um land með mat sem hefur verið lagður í frostlög og skilinn eftir útivið. Frostlögur getur innihaldið efni sem heitir etýlenglýkól en það gefur frostleginum sætt bragð. Dýrin vara sig ekki á hættunni og borða matinn. Þetta leiðir til kvalarfulls dauðdaga þar sem eitrið eyðileggur nýrun.
Linda Karen Gunnarsdóttir, formaður Dýraverndarsambands Íslands segir um mjög alvarlegt dýravelferðarmál að ræða.
„Þetta er brot á lögum um velferð dýra. Það er gríðarlega mikilvægt að það verði brugðist við af því að þetta er svo ofboðslega algegnt að það sé verið að eitra fyrir dýrum og það verður að stöðva það. Þess vegna þurfa stjórnvöld að bregðast við með því að stöðva innfluttning á frostlegi sem inniheldur þetta ákveðna eitur etýlenglýkól.“
Mjög kvalarfullur dauðdagi
Nýlega drápust hundur og köttur í Kjós sem komust í pulsubita sem grunur leikur á að hafi verið bleyttur með frostlegi. Sama gerðist í Sangerði fyrir nokkrum vikum auk þess sem nokkur mál hafa komið upp í Hveragerði.
„Eins og þetta var í Hveragerði þá benti það til þess að þetta hafi verið einstaklingur sem þoldi ekki lausagöngu katta. Þannig að þetta er alltaf að gerast annað slagið og gríðarlega mikilvægt að þetta sé stöðvað. Þetta veldur dýrum gríðarlegum kvölum og það bara þarf að stöðva slíka meðferð á dýrum. Ekki fara að taka uppá þessu að eitra fyrir dýrunum. Frekar að fara aðra leið og leita aðstoðar ef það eru dýr í nágrenningu sem eru að valda áreiti,“ segir Linda Karen.
Sum málanna hafa verið kærð til lögreglunnar og bíða niðurstöðu. Linda Karen biður fólk að taka og farga mat sem það sér á víðavangi.
„Þetta er líka hættulegt fyrir manneskjur. Ef að börn komast til dæmis í mat sem þau sjá á víðavangi þá eru þau líka í stórhættu eins og dýrin. Það er mikilvægt að auka meðvitund um það hversu eitrað þetta er og það er sætt bragð af þessu þannig að maður áttar sig ekki á hættunni og ekki dýrin heldur,“ segir Linda Karen.
Í mörgum Evrópulöndum hafa stjórnvöld og framleiðendur gripið til ráðstafana til að draga úr hættu á frostlagarseitrun, meðal annars með notkun beiskjuefna sem gera frostlöginn slæman á bragðið og með aukinni notkun öruggari valkosta á borð við frostlög sem inniheldur própýlenglýkól.
