Maður sem er upprunalega frá Ítalíu en hefur hefur búið á Íslandi meira og minna alla þessa öld telur ljóst að þrátt fyrir alla þá gagnrýni sem beinst hafi að honum í gegnum árin lifi Sjálfstæðisflokkurinn enn góðu lífi ekki síst vegna þess að það sé sitt hvað við flokkinn sem tali inn í menningu og sögu Íslands. Flokkurinn byggi á grunni sem sé öðruvísi en hjá mörgum stjórnmálaflokkum. Grunni sem snúist um meira en eingöngu stjórnmál.
Valerio Gargiulo rithöfundur og skáld er frá Ítalíu. Hann kom fyrst til Íslands í upphafi þessarar aldar og kom hingað reglulega þar til hann flutti hingað til lands til varanlegrar dvalar árið 2012. Hann fékk síðan íslenskan ríkisborgararétt árið 2021.
Valerio hefur ritað reglulega pistla og greinar um íslensk málefni en í nýrri grein sem birt er á Vísi gerir hann aðdráttarafl Sjálfstæðisflokksins að umtalsefni en eins og kunnugt er kom flokkurinn mjög vel út úr nýafstöðnum sveitarstjórnarkosningum, ekki síst á suðvesturhorninu og stefnir í að hann verði í meirihluta í öllum stærstu sveitarfélögum landsins.
Valerio segir að þegar hann flutti fyrst til Íslands hafi hann reynt að skilgreina íslenska stjórnmálaflokka á þann hátt sem gert er víðast hvar um heim eins og til dæmis hvort um vinstri eða hægri flokka væri að ræða.
Öðruvísi
Hann hafi hins vegar komist að raun um að íslensk stjórnmál væru ekki að öllu leyti svo einföld að hægt væri að skilja þau á þann dæmigerða máta sem stjórnmál eru almennt skilgreind um nánast allan heim:
„En með tímanum fór ég að átta mig á því að á Íslandi eru stjórnmál oft dýpra tengd sögu landsins, samfélagsgerðinni og ákveðinni samfélagsmenningu.“
Sjálfstæðisflokkurinn hefur á undanförnum árum og raunar stóran hluta þessarar aldar sætt harðri gagnrýni og fylgi hans hefur farið minnkandi þar til í sveitarstjórnarkosningunum um helgina þegar það fór upp á við í mörgum sveitarfélögum.
Valerio segist hafa velt því fyrir sér hvers vegna, þrátt fyrir þá gagnrýni sem að honum hafi beinst, breytingar í samfélaginu og sífellda umræðu um framtíð Íslands, Sjálfstæðisflokkurinn haldi áfram að hafa sterka stöðu. Skýringin sé líklega sú að fylgi flokksins byggi að nokkru leyti á íslenskri menningu:
„Sjálft orðið „sjálfstæði“ hefur sérstaka merkingu á Íslandi. Það snýst ekki aðeins um stjórnmál. Það snýst líka um hvernig margir Íslendingar líta á sjálfa sig og landið sitt. Lítið samfélag á eyju langt úti í Atlantshafi sem hefur í gegnum söguna þurft að treysta á eigið úthald, eigin lausnir og ákveðna seiglu.Sem útlendingur hef ég tekið eftir því að margir Íslendingar meta enn mjög ákveðin gildi: sjálfstæði, ábyrgð, vinnusemi, raunsæi og stöðugleika.“
Breytingar
Valerio telur einnig að í heimi sem taki hröðum og sífelldum breytingum leiti margir íslenskir kjósendur að samfellu og festu og telji sig finna þetta í Sjálfstæðisflokknum.
Hann segir einnig að til að skilja íslenskt samfélag verði að horfa út fyrir Reykjavík og þá umræðu sem fram fari á samfélagsmiðlum:
„Það er líka til önnur hlið á Íslandi. Ísland lítilla bæja. Fólks sem vinnur á sjónum, í ferðaþjónustu, iðnaði eða fjölskyldufyrirtækjum. Fólks sem vill breytingar, en ekki of hraðar breytingar. Kannski er sú rödd ekki alltaf sú háværasta. En hún er engu að síður stór hluti af íslensku samfélagi.“
Þetta þýði þó ekki að allir eigi alltaf að vera sammála Sjálfstæðisflokknum. Eftir langa búsetu á Íslandi sé hann hins vegar farinn að skilja að stuðningur við flokkinn snúist hjá mörgum ekki eingöngu um einstök málefni:
„Hann snýst líka um ákveðna sýn á Ísland, sjálfstæði og samband einstaklingsins við samfélagið.“
