Sorpmál á Suðurlandi kosta sveitarfélögin á svæðinu um tvo milljarða króna á ári á sama tíma og flokkun er alltaf að verða betri og betri.
Sorp og allt sem tengist slíkum úrgangi er alltaf stór málaflokkur hjá sveitarfélögum landsins og þar eru sveitarfélög á Suðurlandi engin undantekning. Árni er og veit því allt um stöðu málaflokksins á svæðinu.
„Staðan er náttúrulega eins og er á Suðurlandi að Árborg er stærsta sveitarfélagið og þar af leiðandi langmest af sorpi þar og því er sveitarfélagið líka að fá langmest úr úrvinnslusjóði en á Selfossi hefur tekist að ná mjög góðri flokkun,” segir Árni Magnússon verkefnisstjóri úrgangsmála hjá Sorpstöð Suðurlands.
„Svo er náttúrulega hvati í gegnum Úrvinnslusjóð að flokka betur því það getur sparað sveitarfélögum og þar að leiðandi íbúunum bara töluverða fjármuni”.
Árni segir að sorpmálin kosti sveitarfélögin mikla peninga.
„Málaflokkurinn á Suðurlandi í dag er að slaga í tvo milljarða. Það sem okkur vantar eru betri gögn og sjálfvirkari gagnaöflun til þess að geta tekið betri ákvarðanir, gagnadrifnar ákvarðanir í málaflokknum, til þess að reyna að kostnaðarstýra þessum tveimur milljörðum betur,” segir Árni
En eru einhverjar nýjungar fram undan í sorpmálum á Suðurlandi?
„Nýjungarnar eru náttúrulega margar og aðalhugmyndin núna er mjög spennandi hugmynd um að það sé vigt í hverjum gámi á gámasvæðum þannig að íbúar geti þá skannað sig inn á gámasvæðið eða í hvern gám og hent og borgað nákvæmlega eftir vigt.
Það er líka hvati til þess að fólk hendi minna og hugsi um það sem það er að henda,” segir Árni.
