Jón Pétur Zimsen, varaformaður allsherjar- og menntamálanefndar og þingmaður Sjálfstæðisflokksins, segir niðurskurðaráform ríkisstjórnarinnar á framhaldsskólastiginu til marks um metnaðar- og áhugaleysi ríkisstjórnarinnar í skólamálum.
Til að ná fram sparnaði á framhaldsskólastiginu hefði Jón Pétur frekar viljað sjá meiri sérhæfingu einstakra skóla.
Morgunblaðið fjallaði í gær um þau áform sem birtast í drögum að fjárhagsáætlun ríkisstjórnarinnar um að skera niður fjárframlög til framhaldsskóla um 7,1% á næstu árum. Um er að ræða meiri niðurskurð en í fyrri áætlunum og að sögn Félags framhaldsskólakennara hefur skólastigið sennilega aldrei séð meiri niðurskurð.
Félagið hefur gagnrýnt áformin harðlega, sagt að þau muni gera framhaldsskólum ómögulegt að uppfylla óskir nemenda um nám sitt og bent á að skólastigið hafi þegar verið fjársvelt um árabil.
Algjörlega ósamrýmanlegar aðgerðir
„Þessi niðurskurðaráform slá mann ekki vel. Það er ljóst að þetta mun með einhverjum hætti þurfa að bitna á skólastarfinu,“ segir Jón Pétur og bætir við að niðurskurðurinn sé sérlega óheppilegur í ljósi nýrra laga ríkisstjórnarinnar um framhaldsskóla.
„Nemendahópurinn er að verða fjölbreyttari sem þýðir að það mun kosta meiri tíma og mannafla að takast á við þann fjölbreytileika. Ríkisstjórnin samþykkti nýlega frumvarp um framhaldsskólann þar sem námsárangur var gengisfelldur við inntöku í framhaldsskólann. Það þýðir að í stað þess að skólar geti sérhæft sig varðandi ákveðna hópa nemenda þá eru tilmæli um að skólar taki við miklu fjölbreyttari hópum,“ segir hann og bendir á að til að geta sinnt fjölbreyttari nemendahópum muni skólar þurfa aukin framlög.
„Það sést alveg greinilega hvað gerðist í grunnskólunum þegar ekkert nýtt fjármagn fékkst með skóla án aðgreiningar. Það jók bara álagið og kennarar brunnu út. Árangur minnkaði og velferð minnkaði líka. Þannig að það skýtur verulega skökku við að þessi áform fari saman; að auka fjölbreytileikann og minnka sérhæfingu framhaldsskólanna og skera síðan niður um leið. Það er í raun aðgerð sem er bara algjörlega ósamrýmanleg.“
Vill auka sérhæfingu
Hann segir að nýta hefði mátt fjármagnið sem rennur til menntaskóla betur með því að auka frekar sérhæfingu einstakra framhaldsskóla.
„Það hefði sjálfkrafa sparað fullt af peningum og það hefði aukið gæði framhaldsskólanna vegna þess að þá hefðum við getað nýtt samlegðaráhrif starfsmannahópsins. Þá hefðum við getað sameinað sterka starfsmenn í ákveðnum þáttum skólastarfsins og þeir hefðu getað unnið í ákveðnum skólum og tekið á málunum þar með miklu skilvirkari og ódýrari hætti.“
Verulegt áhugaleysi
Þá segir Jón Pétur ljóst að menntamál séu ekki metnaðarmál ríkisstjórnarinnar.
„Ég held að það blasi alveg við ef þú skoðar þingmálaskrána hjá menntamálaráðherra. Þar eru ný mál teljandi á fingrum annarrar handar. Það er ekkert í gangi þarna þrátt fyrir að ráðherra tali digurbarkalega og ég styð þau áform sem hann hefur talað um. Það er ekkert sem hefur birst að neinu leyti, sérstaklega á framhaldsskólastiginu, bara óreiða og óvissa sem veldur því að stigið er allt í hálfgerðu uppnámi,“ segir hann.
„Þetta er eiginlega allt á sömu bókina lært þarna hjá þeim. Það er enginn metnaður og áhugaleysið verulegt.“
Víðir Reynisson formaður allsherjar- og menntamálanefndar baðst undan viðtali um málið að svo stöddu. Hvorki náðist í Ingu Sæland mennta- og barnamálaráðherra né Daða Má Kristófersson fjármála- og efnahagsráðherra við vinnslu fréttarinnar.
Fáðu þér áskrift til að lesa áfram
Þú ert innskráð(ur) sem ... en ert ekki með áskrift.
Aðgangur að þessari frétt í fullri lengd krefst áskriftar að Morgunblaðinu,
rafræns aðgangs á borð við vikupassa eða séráskriftar að viðkomandi efnisflokki
á mbl.is.
