Þorgerður Katrín Gunnarsdóttir utanríkisráðherra segir brýnt að treysta þjóðinni þegar kemur að því að ákveða hvort hefja eigi aðildarviðræður við Evrópusambandið að nýju.
Sigríður Á. Andersen, þingflokksformaður Miðflokksins, gagnrýnir undirbúning og meðferð tillögunnar harðlega og segir hana meðal annars í skötulíki.
Þorgerður sagði að nú væri komið að þjóðinni
Íslendingar ganga að kjörborðinu 29. ágúst til að greiða atkvæði um aðildarviðræður við Evrópusambandið. Þetta varð ljóst eftir atkvæðagreiðslu á Alþingi í dag. Þá var þingsályktunartillaga utanríkisráðherra samþykkt með 34 atkvæðum gegn átta.
Þorgerður Katrín og Sigríður ræddu tillöguna og umræður á þingi síðustu daga í Kastljósi í kvöld. Aðspurð sagði Þorgerður tillöguna fyrst og fremst snúa að því að treysta þjóðinni.
„Mér finnst þetta snúast um það að gefa íslensku þjóðinni tækifæri til að hætta að hlusta á svona getgátur í stjórnmálafólkinu og miklu frekar að fá upplýsingar um það hvað raunverulegur samningur geti falið í sér. Það er náttúrulega til hagsbóta og það sem við erum að hugsa fyrir börnin og fyrir framtíðina en þjóðin á þennan rétt, það er komið að henni.“
„Yfirgangur í litlum stjórnmálaflokki“
Í Kastljósi gerði Sigríður athugasemdir við ferlið í aðdraganda þess að tillagan var lögð fyrir þingið. Hún sagði það til að mynda ámælisvert að tillagan væri lögð fyrir þingið þegar ekki væri þingmeirihluti fyrir aðild Íslands að Evrópusambandinu.
„Það er auðvitað ákveðinn yfirgangur í litlum stjórnmálaflokki eins og Viðreisn er sem fer í ríkisstjórnarsamstarf að setja það á oddinn í ríkisstjórnarsamstarfi að láta skjóta málinu, eins og þeir kalla það, til þjóðarinnar og láta hana afgreiða þetta.“
Þá sagði Sigríður það ekki ljóst hvað tæki við að lokinni atkvæðagreiðslu um að hefja aðildarviðræður að nýju. Þorgerður sagði svo ekki vera.
„Ég ætla ekkert að draga dul á það að það eru skiptar skoðanir innan ríkisstjórnarinnar um það hvort það eigi að vera aðili að Evrópusambandinu en það er algjör einhugur um það að treysta þjóðinni fyrir næstu skrefum.“
Sigríður sagðist vænta þess að almenningur vildi ræða málin vandlega í aðdraganda kosninganna á næstu mánuðum. Þá líkti hún atkvæðagreiðslunni við skoðanakönnun.
„Maður verður auðvitað bara að vona að fólk geri það. Ég hef í sjálfu sér engar áhyggjur af þessari þjóðaratkvæðagreiðslu, hún er auðvitað ekki eitthvað alfa eða ómega hvað varðar lýðveldið Ísland af því þetta er auðvitað einhvers konar gerviskoðanakönnun.“
Gagnrýndi ráðherra fyrir skort á samráði við hagaðila
Þorgerður sagði tillöguna hafa verið vel undirbúna á undanförnum mánuðum þrátt fyrir að spurningunni hefði verið breytt. Hún væri sátt við breytinguna sem samræmdist tillögum Feneyjanefndarinnar.
„Við ráðfærðum okkur meðal annars við fræðafólk í háskólanum og það komu ákveðnar tillögur en síðan er það sem gerist eðlilega við þinglega meðferð og það er ekki þannig að allt sem ríkisstjórnin kemur með megi ekki breyta því í þingi.“
Sigríður sagði undirbúning tillögunnar í skötulíki. Hún hefði komið inn í þingið með skömmum fyrirvara og að þar að auki hefði lögbundið samráðsferli verið hunsað, meðal annars við fulltrúa atvinnulífsins og verkalýðsins.
„Svo til viðbótar, til að bíta höfuðið af skömminni í þessu ferli, þá er þingmönnum gefinn afar naumur tími til þess að fjalla um málið og ræða það allt. Þetta og margt annað leiðir auðvitað þingmenn sem bera einhverja ábyrgð og vilja láta taka sig alvarlega til þess að greiða atkvæði gegn þjóðaratkvæðagreiðslu sem er sett fram með þessum hætti.“
