Það er ekki á hverjum degi sem ferðamannastaður getur boðið upp á svartfjörur, eldfjallalandslag, frumskógalíka skóga, kletta sem rísa úr Atlantshafinu og stjörnubjartan himin – allt innan sömu eyjunnar.
Tenerife hefur um árabil verið þekkt fyrir sól og strendur en sífellt fleiri ferðalangar eru nú að uppgötva að eyjan hefur líka fjölmargar aðrar hliðar. Þar mætast náttúruupplifanir, útivist og sjálfbær hugsun á einstakan hátt sem skapar áfangastað sem höfðar til þeirra sem vilja meira en hefðbundið strandfrí.
Tenerife er stærsta eyja Kanaríeyja og þar ríkir stöðugt og milt loftslag allt árið um kring, með meðalhita um 23 gráður. Það gerir ferðamönnum kleift að njóta náttúrunnar óháð árstíð, hvort sem um er að ræða gönguferðir um eldfjallaslóðir, kajakferðir meðfram klettaströndum eða hvala- og höfrungaskoðun á opnu hafi.
Fjölbreytt náttúra á einni eyju
Það sem vekur hvað mesta athygli margra gesta er hversu fjölbreytt landslagið er. Á aðeins einum degi er hægt að ganga um þéttan lárviðarskóg í Anaga Rural Park, aka upp í hrjóstrugt og dramatískt eldfjallalandslag Teide-þjóðgarðsins og enda svo daginn við svarta sandströnd við Atlantshafið.
Á eyjunni eru 43 vernduð náttúrusvæði sem ná yfir nær helming landsins. Þar á meðal eru Anaga Rural Park og Teno Rural Park sem bjóða upp á einstaka gönguleiðir og stórbrotið útsýni.
Teide-þjóðgarðurinn er síðan einn þekktasti staður eyjunnar en þar rís Teide-fjallið, hæsta fjall Spánar, um 3.715 metra yfir sjávarmáli.
Göngufólk hefur úr miklu að velja því á Tenerife eru um 1.500 kílómetrar af merktum gönguleiðum sem liggja um skóga, fjöll og strandir.
Sumir velja rólegar göngur í náttúrunni á meðan aðrir sækjast eftir meiri áskorunum, eins og Route 040-leiðinni sem liggur frá sjávarmáli upp á topp Teide-fjalls og er talin ein mest krefjandi hlaupaleið Evrópu.
Ævintýri á landi, sjó og í lofti
Tenerife hefur einnig skapað sér sterka stöðu sem áfangastaður fyrir útivist og ævintýraferðamennsku. Þar má finna fjölbreytt úrval af íþróttum og afþreyingu, bæði fyrir byrjendur og lengra komna.
Fjallahjólreiðar njóta mikilla vinsælda og um 200 kílómetrar af hjólaleiðum liggja um eyjuna, meðal annars í gegnum Corona Forestal-skógarsvæðið.
Þá sækja hjólreiðamenn víða að til Tenerife til æfinga enda hafa margir atvinnumenn nýtt sér hæðina, loftslagið og fjölbreyttar leiðir í undirbúningi fyrir stór mót á borð við Tour de France.
Sjávarlífið er annar stór þáttur í upplifuninni við að heimsækja Tenerife. Við strendur eyjunnar eru yfir 40 köfunarsvæði þar sem sjá má meðal annars skjaldbökur, englahákarla og stórar fiskitegundir í tærum sjónum.
Þá er Tenerife einn besti staður Evrópu til að fylgjast með hvölum og höfrungum í náttúrulegu umhverfi sínu en við suðvesturströnd eyjunnar lifa meðal annars stöðugir hópar grindhvala og höfrunga allt árið um kring.
Á þeim svæðum eru eingöngu leyfðar skipulagðar ferðir með sérvottuðum aðilum sem fylgja sérstökum sjálfbærniviðmiðum til að tryggja vernd dýralífsins.
Fyrir þá sem vilja meiri hraða og adrenalín eru aðstæður einnig kjörnar fyrir brimbrettabrun, flugdrekabrun og vindbretti. El Médano-ströndin er meðal þekktustu staða Evrópu fyrir slíkar íþróttir þar sem vindur blæs meira en 300 daga á ári.
Og fyrir þá sem vilja sjá eyjuna úr lofti er svifvængjaflug vinsæl leið til að upplifa landslagið frá öðru sjónarhorni. Frá flugtaksstöðum í yfir 2.000 metra hæð er hægt að svífa niður að ströndinni með útsýni yfir Teide, furuskóga og Atlantshafið.
Sjálfbærni í forgrunni
Á síðustu árum hefur Tenerife lagt sífellt meiri áherslu á sjálfbærni í ferðaþjónustu. Eyjan hefur hlotið Biosphere-vottun sem staðfestir skuldbindingu hennar við markmið Sameinuðu þjóðanna um sjálfbæra þróun.
Þar er unnið markvisst að vernd líffræðilegrar fjölbreytni, ábyrgri auðlindanýtingu og því að þróa ferðaþjónustu í sátt við náttúru og samfélag.
Ferðaþjónustufyrirtæki á eyjunni hafa einnig tekið virkan þátt í þeirri vegferð. Sérstakir sjálfbærnisáttmálar hafa verið þróaðir fyrir hvalaskoðun, útivistarferðir og náttúruafþreyingu þar sem lögð er áhersla á að ferðamenn geti notið náttúrunnar án þess að skilja eftir sig neikvæð spor.
Samhliða því hefur verið lögð áhersla á að efla staðbundna framleiðslu, styðja við smærri samfélög og hvetja gesti til að upplifa eyjuna á hægari og meðvitaðri hátt. Það má meðal annars sjá í aukinni áherslu á gönguferðir, náttúruupplifanir, staðbundna matarmenningu og vistvæna gistingu.
Eyja sem vekur tilfinningar
Tenerife er staður þar sem fólk tengist náttúrunni, hægir á sér og upplifir hið óvænta. Ferðamálayfirvöld á Tenerife hafa síðustu ár lagt áherslu á slagorðið „Tenerife awakens emotions“ eða „Tenerife vekur tilfinningar“.
Markmiðið er að sýna að eyjan sé meira en hefðbundinn sólaráfangastaður, að hún sé staður þar sem fólk tengist náttúrunni, róast niður og upplifir eitthvað óvænt.
Kannski er það einmitt það sem gerir Tenerife frábrugðna mörgum öðrum áfangastöðum. Þar er hægt að liggja á ströndinni í sólskini um morguninn, ganga um eldfjallalandslag síðdegis og horfa svo upp í einn tærasta stjörnuhimin Evrópu þegar kvöldar.
Eyjan býður upp á ró og ævintýri á sama tíma og náttúra sem heldur áfram að koma á óvart.
