Margir töldu að flóknustu meirihlutaviðræður landsins færu fram á Akureyri í ljósi úrslitanna í sveitarstjórnarkosningunum. Enginn flokkur fékk meira en 19,4% atkvæða og enginn af þeim átta sem buðu fram fékk minna en 6%. Sjö flokkar náðu kjöri í bæjarstjórn og ljóst að þrjá flokka þurfti til að mynda meirihluta.
Meirihlutinn féll en hann samanstóð af L-lista, Sjálfstæðisflokki og Miðflokki.
Þrátt fyrir þessa niðurstöðu eru meirihlutaviðræður vel á veg komnar og stefnir í að L-listinn og Sjálfstæðisflokkurinn muni halda áfram samstarfi, eins og undanfarin fjögur ár, og skipta Miðflokknum út fyrir Framsóknarflokkinn.
„Ég held að áherslurnar okkar séu bara svipaðar og það er kannski ástæðan fyrir því að það er ekki mikill munur milli framboða því það var bara ágætis samhljómur meðal okkar og gott fólk í öllum flokkum. Það verður ánægjulegt að sjá hvernig þetta þróast. Við ætlum ekkert að flýta okkur of hratt og taka þetta rólega og ræða málin svona almennilega inn í vikuna og sjá svo til,“ segir Berglind Ósk Guðmundsdóttir, oddviti Sjálfstæðisflokksins á Akureyri.
Meirihlutinn féll
L-listinn tapaði einum bæjarfulltrúa frá því í kosningunum 2022. Undanfarin fjögur ár hafa þeir verið í meirihluta með Sjálfstæðisflokki og Miðflokki. Sökum þess að L-listinn tapaði einum manni og Sjálfstæðisflokkur (2 fulltrúar) og Miðflokkur (1 fulltrúi) stóðu í stað var ekki hægt að halda áfram núverandi meirihlutasamstarfi. Svo virðist sem oddvitar þessara flokka hafi verið fljótir að bregðast við og eru viðræður hafnar við Framsóknarflokkinn, sem fékk tvo fulltrúa kjörna.
„Það er búið að taka einn fund og við ætlum að hittast aftur á morgun. Ég er bara brattur sko og það þarf eitthvað mikið að gerast svo þetta fari til fjandans,“ segir Óðinn Svan Óðinsson, oddviti L-listans á Akureyri.
Samfylkingin fær ekki sæti við borðið
Fylgið á Akureyri dreifðist nokkuð jafnt milli þeirra átta flokka sem voru í framboði. Fjórir flokkar fengu tvo menn kjörna og þrír flokkar fengu einn mann kjörinn. Eini flokkurinn sem fékk tvo menn kjörna og fær ekki sæti við meirihlutaviðræðurnar er Samfylkingin, sem starfaði í meirihluta með L-listanum á árunum 2014-2022.
„Við útilokuðum ekkert áður en við fórum af stað,“ segir Óðinn og bætir við: „Málefnin hafa verið líkust hjá þessum þremur flokkum eftir að fyrstu tölur komu. Auðvitað eru margir möguleikar í boði en þetta var það sem við vildum fyrst skoða.“
„Þessir flokkar höfðu mjög svipaðar áherslur og við ætlum bara að byrja þar og sjá hvernig gengur,“ segir Berglind Ósk og segir að ekki hafi verið um neina skipun á landsvísu að Sjálfstæðisflokkur myndi ekki vinna með Samfylkingu: „Það er gott fólk í öllum flokkum og við erum bara spennt að halda áfram þessu samtali sem við höfum byrjað í dag.“
