Kristrún Frostadóttir forsætisráðherra var spurð hvað hefði komið út úr samtölum hennar við hátt setta aðila innan Evrópusambandsins og aðra þjóðarleiðtoga á opnum fundi utanríkismálanefndar Alþingis í morgun.
Hún sagði samtölin gefa von en gaf lítið upp um innihald þeirra. „Þetta eru fyrst og fremst samtöl sem fela í sér öfluga hagsmunagæslu. Það er engu slegið föstu í svona samtölum vegna þess að það breytir því eiginlega ekki hvað ég mun koma og segja hér inni. Fólk myndi eflaust ekki trúa mér fyrr en við sjáum samninginn.“
Þetta sagði hún við spurningu Stefáns Vagns Stefánssonar, þingmanns Framsóknar.
Nefndarmenn kröfðu hana einnig svara um gagnrýni á orðalag spurningarinnar sem bera á upp í ágúst og innleiðingu Evrópuréttar á Íslandi, meðal annars.
Ætla ekki að breyta lögum eða stjórnarskrá meðan á aðildarviðræðum stæði
Þorgerður Katrín Gunnarsdóttir utanríkisráðherra sagði á opnum fundi utanríkismálanefndar í síðustu viku að ekkert væri til í fullyrðingum um að Ísland yrði að hefja aðlögun að ESB samstundis ef þjóðin veldi að halda áfram viðræðum.
Kristrún tók í sama streng.
„Aðlögun sem er umfangsmikil í Evrópusambandinu hefur verið meðal þjóða sem hafa verið langt aftur úr öðrum Evrópusambandsþjóðum. Við erum mjög nálægt Evrópusambandsríkjum.“
„Aðlögunar er ekki þörf í jafn miklum mæli og í öðrum löndum. En það stendur ekki til að við séum búin að breyta hér lögum, hvað þá stjórnarskrá í landinu, á meðan aðildarviðræður standa yfir,“ sagði forsætisráðherra.
