Sveinn Andri Sveinsson, verjandi Sindra Snæs Birgissonar sem ákærður var í hryðjuverkamálinu svokallaða, telur að umbjóðandi sinn geti krafið ríkið um tugi milljóna í skaðabætur.
Þetta segir verjandinn í samtali við mbl.is.
Ríkissaksóknari tilkynnti fyrr í dag að ekki yrði leitað áfrýjunarleyfis til Hæstaréttar vegna dóms Landsréttar í málinu þar sem Sindri og Ísidór Natansson voru sýknaðir af ákæru fyrir hryðjuverk. Málinu, sem hófst haustið 2022 með handtöku þeirra beggja, er því lokið.
Kemur ekki á óvart
Ákvörðun ríkissaksóknara kemur Sveini ekki á óvart en hann hafði lýst því yfir í viðtölum eftir dóm Landsréttar að hann teldi að niðurstaðan yrði endanleg.
Um var að ræða annan dóm Landsréttar í málinu en Hæstiréttur hafði áður ómerkt dóm Landsréttar og vísað málinu þangað aftur.
„Landsréttur mætti öllum þeim athugasemdum sem komu frá Hæstarétti og kvað upp mjög ítarlegan dóm. Mér fannst þetta mjög normalt eiginlega,“ segir Sveinn um fréttir dagsins.
Bótagrundvöllur kemur í ljós
Telur lögmaðurinn að Sindri og Ísidór eigi nú háa bótakröfu hjá ríkinu vegna málsins.
„Það er komið núna fjögurra ára gap inn í þeirra líf þar sem allt var stopp og það blasir við að þeir munu sækja skaðabætur á hendur ríkissjóði vegna þessara aðgerða. Hversu háar þær verða og á hvaða forsendum þær verða sóttar, það á allt eftir að koma í ljós.“
Heldur þú að kröfurnar geti hlaupið á einhverjum tugum milljóna eða eitthvað þvíumlíkt?
„Já, það myndi ég ætla. Þetta er ágætur tími þar sem líf þeirra er bara tekið úr sambandi, einhver fjögur ár. Það er enginn að ráða þig í vinnu með einhverja hryðjuverkaákæru á bakinu,“ svarar Sveinn Andri.
Málinu var löngu lokið
Sveinn hefur ítrekað gagnrýnt vinnubrögð ríkislögreglustjóra í tengslum við málið.
„Nú lýkur þessu máli formlega en því var löngu lokið. Þetta var einhver þvermóðska að halda þessu málið gangandi einhvern veginn til þess að réttlæta þessi upphaflegu mistök sem gerð voru í málinu, sem var að fara í það að handtaka þessa drengi.
Miðað við þær upplýsingar og þau gögn sem voru í málinu og þá greiningartækni sem liggur fyrir í svona málum þá hefði verið nægjanlegt að skyggja þá eins og lögreglan á höfuðborgarsvæðinu ætlaði að gera fyrst. Það felst í því að hlera símtöl og vera með eftirfararbúnað og svo framvegis,“ svarar verjandinn.
