„Mér finnst þessi niðurstaða hafa legið í loftinu,“ segir Eiríkur Bergmann, prófessor í stjórnmálafræði við Háskólann á Bifröst, um nýjan meirihluta í Reykjavík.
Hann segir meirihlutann jafnvel augljósasta kostinn sé skoðað hvernig oddvitarnir töluðu í kosningabaráttunni. „Þetta kemur ekki á óvart,“ segir hann um að Miðflokkurinn hafi ekki ratað í meirihlutann.
Stjórnkerfið og samgöngumál
Eiríkur bendir á að Samfylkingin eða Reykjavíkurlistinn hafi stjórnað borginni í rúmlega 30 ár með stuttum hléum.
„Þegar nýr meirihluti tekur við núna er eðlilegt að menn hugi að töluverðum breytingum. Það er tvennt sem er helst í umræðunni. Annars vegar stjórnskipunarmál innan borgarapparatsins og síðan þessi samgöngumál.“
Flokkarnir hafi allir talað fyrir því að stokka upp í stjórnkerfi borgarinnar. Hvað samgöngumálunum viðkemur er ekki alveg augljóst hvað flokkarnir ætli sér. „Það er málaflokkur sem þarf að takast á við.“
Naumur meirihluti en engin augljós vandræði
Nýi meirihlutinn er eins naumur og hægt verður, með tólf borgarfulltrúa. „Það eru engin augljós vandræði,“ segir Eiríkur og bendir á að engar fylkingar séu innan flokkanna sem þekktar eru fyrir að vera órólegar.
„Sjálfstæðisflokkurinn hefur samhentan hóp, að því er virðist. Einar og Björg hafa unnið saman. En eins manns meirihluti er alltaf flókinn.“
Það sem er klókt við meirihlutann er, að mati Eiríks, að hann klýfur minnihlutann. „Þú ert með vinstri flokkana öðrum megin við hann og Miðflokkinn hinum megin. Þetta nær ákveðinni breidd.“
