Sjósundskappinn Sigurgeir Svanbergsson þurfti að ljúka sundi sínu niður Lagarfljót snemma vegna ofkælingar.
Sigurgeir, sem stakk sér til sunds í gærkvöld, hafði ætlað sér að synda í 50 kílómetra niður fljótið og verða þar með fyrstur manna til að synda niður Lagarfljót.
Í færslu sem birt var á Instagram-reikningi Sigurðar í morgun segir að hann hafi þurft að hætta sundinu þar sem aðstæður í Lagarfljóti voru ólíkar því sem spár gerðu ráð fyrir.
Þegar þá var komið við sögu hafði Sigurður synt um 15 kílómetra og klukkan var að ganga fjögur en hann lagði af stað klukkan níu í gærkvöld.
„Aðstæður í Lagarfljóti voru ekki eins og spár, fyrri ár og athuganir gerðu ráð fyrir,“ segir í Instagram-færslunni.
„Þannig var vatnið um 2-4 gráður en ekki 8 gráður eins og gert var ráð fyrir.“
Þá hafi Sigurður orðið fyrir ofkælingu um klukkan fjögur og því verið fluttur á Heilbrigðisstofnun Austurlands til aðhlynningar og þaðan á Norðfjörð. Í færslunni segir að Sigurður eigi eftir að ná fullri heilsu að nýju og að hann sé undir eftirliti sérfræðinga.
Vigdís Diljá Óskarsdóttir, ein þeirra sem var í stuðningsteymi Sigurgeirs, var gestur í Morgunútvarpi Rásar tvö í morgun. Hún segir sundið hafa gengið vel framan af en síðan hafi ofkæling farið að segja til sín.
„Hann var farinn að skjálfa svo mikið að hann gat eiginlega ekkert synt lengur, var orðinn eins og ísklumpur,“ sagði Vigdís Diljá. Þá hafi ekki verið vit í öðru en að Sigurgeir lyki sundinu.
Að sögn Vigdísar var búið að gera athuganir á vatninu og sundið reiknað út frá því að hitinn væri um átta gráður. Þegar á hólminn var komið reyndist vatnið hins vegar ekki nema rúmlega tvær gráður.
„Honum fannst erfitt að kuldinn hefði unnið þarna, hann vildi fá að sigra kuldann.“
