„Það eru allir búnir að fá nóg af þessu hérna. Það er svo mikil ólga hérna í bænum að ég eiginlega get ekki lýst því.“
Þetta segir Þórunn Pálsdóttir, íbúi í Vestmannaeyjum. Hún segir stöðu samgangna þar grafalvarlega. Upplýsingagjöf til Eyjamanna sé fyrir neðan allar hellur og bæta verði flugsamgöngur.
Ekki er útlit fyrir að hægt verði að sigla Herjólfi til Landeyjahafnar næstu daga, en höfnin hefur verið lokuð mestallt árið vegna sandburðar. Á meðan hefur verið siglt til Þorlákshafnar sem er mun lengri leið.
Sigling Herjólfs frá Þorlákshöfn til Vestmannaeyja í gærkvöld tók tæpar sjö klukkustundir. Skipið lagðist ekki að bryggju í Eyjum fyrr en á þriðja tímanum í nótt.
Gengur illa að dýpka Landeyjahöfn
Þórunn Pálsdóttir íbúi í Vestmannaeyjum segir ástandið óboðlegt. Hún hefur ítrekað vakið athygli á stöðunni við ráðamenn
„Ég er núna búin að skrifa 17 pistla um ástandið hérna og sent það á bæði forsætisráðherra og innviðaráðherra.“
Þórunn segir upplýsingagjöf Vegagerðarinnar og innviðaráðuneytisins um stöðuna fyrir neðan allar hellur. Hún hafi rætt við aðstoðarmann innviðaráðherra í gær og kallað eftir því að ráðuneytið leitaði nýrra leiða til að dýpka Landeyjahöfn. Ljóst sé að verkefnið gangi illa hjá íslenska dýpkunarskipinu Álfsnesi.
Vilja flug allan ársins hring
Þá telji hún einnig að taka þurfi til skoðunar að efla flugsamgöngur til eyja. Einungis sé flogið til og frá Vestmannaeyjum fjórum sinnum í viku með níu manna flugvél.
„Við viljum bara hafa flug hérna alla daga og helst allt árið um kring. Það hefur ekki verið flogið til eyja allt árið um kring síðan árið 2010.“
Flugferðum hafi fækkað með tilkomu Landeyjahafnar en Þórunn segir ljóst að tilefni sé til að endurskoða það fyrirkomulag eins og staðan er nú.
„Sextán ár síðan Landeyjahöfn var opnuð, og hún virkar ekki.“
