Landssamtökin Þroskahjálp óttast að of mikil áhersla sé lögð á uppbyggingu sérskóla fyrir börn sem þurfa sérþjónustu og ekki næg á að tryggja að sú þjónusta standi til boða innan almenna skólakerfisins. Þroskahjálp vinnur að réttindum og hagsmunum fatlaðs fólks.
Formaður Þroskahjálpar segir alvarlegt ef sérskólar verða notaðir til að færa fötluð börn úr almennu skólasamfélagi.
Samtök sveitarfélaga á höfuðborgarsvæðinu, ásamt mennta- og barnamálaráðuneytinu og innviðaráðuneytinu, hafa undirritað viljayfirlýsingu um uppbyggingu sérskólaúrræða. Bið eftir sérþjónustu er mikil og sum sérskólaúrræði, líkt og Klettaskóli, eru löngu sprungin.
136 í skóla fyrir 90 börn
Klettaskóli rúmar til að mynda um 90 nemendur en 136 börn eru í skólanum, þrátt fyrir að 41 hafi verið synjað í fyrra, samkvæmt skýrslu sem ráðgjafafyrirtækið HLH vann fyrir Samtök sveitarfélaga á höfuðborgarsvæðinu.
„Það er auðvitað jákvætt þegar vandinn er viðurkenndur og við höfum fyrir framan okkur að verkefnið er stórt,“ segir Guðmundur Ármann Pétursson, formaður Þroskahjálpar.
Viljayfirlýsing ríkis og sveitarfélaga sé mikilvægt skref að því gefnu að næstu skref verði unnin út frá réttindum barna, faglegri þekkingu og virku samráði við fatlað fólk, foreldra og samtök.
Loksins séu stjórnvöld að átta sig á því að lausn á vandanum geti ekki beðið. Fórnarkostnaðurinn sé of mikill og óásættanlegur.
Meginstefið skóli án aðgreiningar
Guðmundur segir það vonbrigði að samráð við hagsmunasamtök fatlaðs fólks hafi verið í mýflugumynd. Þroskahjálp hafi áhyggjur af bakslagi í réttindamálum. Áhersla á byggingu nýs sérskóla til að leysa vandann sé skref til baka.
„Áhygggjur okkar eru ýmsar í þessu máli. Við erum svolítið hrædd við að menn fari að nýta svona sérskóla til að aðskilja frá skóla án aðgreiningar og að færa okkur þá mjög langt aftur í tímann,“ segir Guðmundur.
Þörf sé á meiri fjármögnun, betri aðstöðu og fjölgun fagfólks innan almenna skólakerfisins. Annar sé hætta á að ný úrræði fyllist fljótt og sami vandi birtist aftur.
„Megin stefið á að vera skóli án aðgreiningar. Það að fara í sérdeild eða sérskóla á helst að vera tímabundið úrræði sem er að styðja þig inn í almennan skóla, ekki taka þig út úr honum og halda þér þar mögulega út þína skólagöngu.“
