Vegagerðin segir skort á fjárveitingum helstu ástæðu þess að ekki hafi verið farið hraðar í framkvæmdir á malarvegum í Árneshreppi, þrátt fyrir gagnrýni íbúa og ferðaþjónustuaðila á ástand vegarins.
Þetta segir G. Pétur Matthíasson upplýsingafulltrúi Vegagerðarinnar í samtali við mbl.is um stöðu malarvega í Árneshreppi.
Gróður farinn að vaxa á efnishólum
Í gær greindi mbl.is frá gagnrýni Magnúsar Karls Péturssonar, hótelstjóra Hótels Djúpavíkur, sem sagði slæmt ástand malarvega í Árneshreppi hamla starfsemi hótelsins og hafa áhrif á bæði íbúa og ferðaþjónustu á svæðinu.
Að sögn Magnúsar fékk Vegagerðin verktaka til að vinna efni til að bera á veginn fyrir nokkrum árum.
Hann segir efnið aftur á móti hafa staðið óhreyft síðan. Nú sé til að mynda farinn að vaxa gróður á efnishólunum sem eru á víð og dreif um Árneshrepp.
Malarvegir fá lítið fjármagn
G. Pétur segir að efnið sem unnið hafi verið á svæðinu sé ekki ætlað til tafarlausrar notkunar í heild sinni heldur sé það unnið á næstu fimm til átta árum.
„Þegar menn fara af stað að vinna efni þá er það unnið og haustsett og síðan notað þegar fjármagn fæst til framkvæmda,“ segir hann.
Vegagerðin beri ábyrgð á efninu sem er notað í vegina og er það nýtt eftir því sem fjárveitingar fást til viðhalds.
„Við erum alltaf að biðja um meira fé til viðhalds. Það hefur aukist á síðustu árum, en ekki nema rétt til þess að halda í horfinu,“ segir G. Pétur.
Hann bendir á að stór hluti vegakerfisins í Árneshreppi sé malarvegir. „Þetta eru um 85 kílómetrar og fjármagnið dugir kannski í nokkra kílómetra á ári,“ segir hann að lokum.
