Hluthafar Símans hf. samþykktu í dag að breyta nafni samstæðunnar í Ásar hf. Með breyttu skipulagi færist fjarskipta- og miðlarekstur í nýtt dótturfélag sem heitir Síminn ehf.
Í tilkynningu félagsins segir að síðustu mánuði hafi orðið umbreyting í rekstrinum en í desember var tilkynnt um kaup félagsins á Opnum kerfum og Öryggismiðstöð Íslands. Í síðasta mánuði var gengið frá kaupum á Greiðslumiðlun Íslands.
Með breyttu skipulagi samstæðunnar sé fjarskipta- og miðlarekstur færður í nýtt dótturfélag sem mun heita Síminn ehf. Þá verði hlutverk móðurfélagsins enn að styðja við áframhaldandi vöxt og þróun.
„Nafnabreytingin er stórt skref í enn stærra verkefni, en orðið vísar í áherslu okkar á agaðan vöxt í fleiri áttir sem hverfist ávallt um skýran miðpunkt í traustri og öruggri stafrænni þjónustu,“ er haft eftir Maríu Björk Einarsdóttur, forstjóra Ása, í tilkynningu.
„Gríðarmikil tækifæri felast í sameinaðri fjártæknistarfsemi samhliða kaupum á Greiðslumiðlun Íslands. Við horfum m.a. til erlendra fyrirtækja á borð við Revolut, Klarna, Ramp og Fresha sem hafa byggt upp öflug vistkerfi óháðra fjártæknilausna.“
