Evrópskar leyniþjónustur telja að kínverski herinn hafi þjálfað hundruð rússneskra hermanna til bardaga í Úkraínu, að sögn þýska dagblaðsins Die Welt, en blaðið vitnar þar í leyniskjöl sem það hefur undir höndum. Kínverski herinn, sem einnig er kallaður „Frelsisher alþýðunnar“, er talinn hafa staðið fyrir leynilegri þjálfun nokkur hundruð rússneska hermanna seint á síðasta ári í sex herstöðvum í Kína.
Þjálfunin snerist aðallega um notkun dróna og rafrænna gagnaðgerða gegn óvinadrónum. Voru margir Rússanna sendir í kjölfarið til að berjast í Úkraínu, meðal annars í þrautþjálfaðri drónasveit Rússa, sem nefnist „Rúbíkon“, en hún berst í framlínu átakanna.
Í umfjölluninni kemur einnig fram að grunur leiki á að hermenn frelsishersins hafi fengið leynilega þjálfun í Rússlandi. Evrópskar leyniþjónustur segja að um 600 kínverskir hermenn hafi dvalið í rússneskum herstöðvum á síðasta ári til að læra um brynvarinn hernað, beitingu stórskotaliðs og notkun loftvarna. Þá leikur einnig grunur á að Rússar og Kínverjar deili með sér ítarlegum upplýsingum um þau háþróuðu evrópsku og bandarísku vopn sem Úkraína hefur undir höndum, þar á meðal búnað sem rússneskir hermenn hafa handsamað á vígvellinum.
Kínversk stjórnvöld hafa lýst yfir hlutleysi sínu í Úkraínustríðinu, en ríki Evrópu hafa sakað Kínverja um að hafa veitt Rússum margvíslegan stuðning, aðallega með útflutningi á gögnum, sem geta nýst bæði til hernaðar og borgaralegra nota. Sé frétt Die Welt rétt, vekur hún hins vegar grun um að sá stuðningur sé mun umfangsmeiri en áður hafi verið vitað um.
Samband ríkjanna sterkt
Xi Jinping Kínaforseti bauð Vladimír Pútín Rússlandsforseta velkominn til Peking á þriðjudag, en tengsl ríkjanna hafa styrkst mjög frá því að Pútín hóf allsherjarinnrás sína í Úkraínu í febrúar 2022. Hefur Kína t.d. neitað að fordæma innrás Rússa, á sama tíma og Pútín hefur orðið háðari Kína þar sem refsiaðgerðir hafa dregið úr tekjum af sölu olíu til Vesturlanda og er Kína því nú orðið helsta viðskiptaland Rússa í olíuútflutningi þeirra.
AFP-fréttastofan sagði í umfjöllun sinni um málið í gær að hún hefði ekki getað staðfest frétt Die Welt. Marc Henrichmann, formaður eftirlitsnefndar þýska þingsins um leyniþjónustumál, sagði hins vegar að frétt dagblaðsins væri trúverðug og í samræmi við þróunina síðustu ár.
„Augljóst er að það hefur myndast sífellt nánara samstarf milli ríkjanna í hernaðar- og í efnahagsmálum síðan innrás Rússa hófst. Frá árinu 2022 hefur stór hluti af rússnesku stríðsvélinni reitt sig á kínverskar vörur með tvennan tilgang, allt frá ljósleiðurum fyrir dróna og örflögum til véla og knúningshreyfla fyrir langdræg vopn,“ sagði Heinrichmann í viðtali við þýska fréttamiðilinn Handelsblatt.
Talsmaður þýska utanríkisráðuneytisins vildi ekki tjá sig beint um málið en lýsti yfir áhyggjum. „Vaxandi stuðningur Kína við Rússland í stríðinu í Úkraínu hefur einnig áhrif á öryggi okkar. Í öllum viðræðum okkar við Kínverja höfum við tekið mjög skýrt fram þær áhyggjur sem við höfum af stuðningi þeirra við Rússa,“ bætti hann svo við.
Fáðu þér áskrift til að lesa áfram
Þú ert innskráð(ur) sem ... en ert ekki með áskrift.
Aðgangur að þessari frétt í fullri lengd krefst áskriftar að Morgunblaðinu,
rafræns aðgangs á borð við vikupassa eða séráskriftar að viðkomandi efnisflokki
á mbl.is.
