Páll Valsson rithöfundur og útgefandi segir ró þjóðskáldsins Jónasar Hallgrímssonar ekki vera raskað með því að grafa upp bein hans. Henni hafi þegar verið raskað fyrir 80 árum þegar beinin voru grafin upp í Kaupmannahöfn.
Hópur þjóðþekkts fólks sem vinnur að kvikmynd um ævi Jónasar Hallgrímssonar óskaði eftir leyfi til þess að grafa bein hans upp í þjóðargrafreitnum á Þingvöllum, taka úr þeim sýni og senda í erfðagreiningu. Þingvallanefnd segist ekki geta veitt slíka heimild nema fyrir liggi dómsúrskurður. Páll er meðal þeirra sem eru á bak við umsóknina.
Efasemdir um hvort beinin séu af Jónasi
Páll segir að alveg frá því að beinin voru grafin upp hafi verið efasemdir um að þetta væru hin raunverulegu bein Jónasar.
„Ég skoðaði þessi gögn á sínum tíma og það var Matthías Þórðarson þjóðminjavörður sem fór ofan í gröfina. Þar fengust leyfi hjá dönskum yfirvöldum til þess að fara og sækja beinin. Það voru einir fjórir fyrir í gröfinni en hann gerir ágætlega grein fyrir því að þetta séu rétt bein. En það er auðvitað einhver vafi alltaf. Um leið og þessi bein lentu hér á Íslandi þá tók við mjög furðuleg atburðarás sem að allar götur síðan hefur varpað skugga á þennan svokallaða þjóðargrafreit.“
Engin rök gegn því að grafa beinin upp
Páll segir þjóðina skulda Jónasi að fá úr þessu máli skorið.
„Ef einhver er þess maklegur að hvíla á Þingvöllum þá er það Jónas Hallgrímsson sem átti stærstan þátt í því að móta Þingvelli sem heilagan stað í huga okkar með kvæðum sínum, sögum og skrifum.“
Efasemdirnar hafa varpað skugga á arfleifð Jónasar að mati Páls og finnst honum kominn tími og tækifæri til þess að ganga úr skugga um þetta mál og eyða efasemdum í eitt skipti fyrir öll.
Páll sér engin rök gegn því að grafa beinin upp. Fengi hópurinn leyfi fyrir uppgreftrinum væri það alveg ný viðspyrna fyrir Þingvelli sem þjóðgarð og fyrir þjóðargrafreitinn. Séu beinin ekki af Jónasi sé það niðurstaða sem verði að vinna með.
„Þarna gefst tækifæri til þess að eyða þessu deilumáli sem þjóðin hefur rifist um í alla þessa áratugi.“
