Þorgerður Katrín Gunnarsdóttir, utanríkisráðherra, og Sigríður Andersen, þingmaður Miðflokksins, voru gestir Kastljóss eftir að þjóðaratkvæðagreiðslan hafði verið samþykkt í þinginu með 34 atkvæðum gegn átta en 14 þingmenn Sjálfstæðisflokksins og Framsóknar sátu hjá. Þorgerður Katrín var að vonum ánægð og brosandi eftir að þessi úrslit lágu fyrir með svo afgerandi hætti. Fýlan lak hins vegar af Sigríði sem braust út í hrokafullum málflutningi hennar í þættinum. Þingmanni Miðflokksins var efst í huga að staglast á útúrsnúningi sínum um að þjóðaratkvæðagreiðsla væri „gerviskoðanakönnun“ sem var vægast sagt klaufalegt hjá henni. Miðflokkurinn og Jón Gunnarsson úr Miðflokksarmi Sjálfstæðisflokksins kusu á þinginu gegn því að þjóðin fengi að lýsa skoðun sinni á framvindu Evrópumálanna. Þeir völdu nei gagnvart kjósendum á Íslandi á meðan 34 þingmenn sögðu já til að undirstrika vald og áhrif kjósenda.
Orðið á götunni er að í þessum Kastljósþætti hafi áhorfendur getað séð og heyrt um hvað málið snýst og getað metið trúverðugleika talsmanna mismunandi skoðana. Þorgerður Katrín var róleg, yfirveguð og örugg í framkomu sinni eins og sá sem veit að hann hefur góðan málstað að verja. Sigríður Andersen var frek, dónaleg og hrokafull sem einkennir æði oft þegar reynt er að breiða yfir minnimáttarkennd. Þá brýst hrokinn út. Málflutningur Sigríðar einkenndist af hræðsluáróðri og útúrsnúningum og þannig hefur það verið hjá flestum neiliðum fram að þessu og þannig verður það áfram hjá þeim.
Hópurinn sem vill ekki lofa þjóðinni að segja skoðun sína er keimlíkur. Ekki bara Sigríður Andersen og félagar hennar í Miðflokknum og bandamenn í Miðflokksarmi Sjálfstæðismanna eins og Jón Gunnarsson. Nauðalík þeim í framkomu og öllum háttum eru Guðni Ágústsson, Erna Bjarnadóttir, Hjörleifur Guttormsson, Haraldur Ólafsson, Jón Bjarnason, Ögmundur Jónasson, Sigurður Kári Kristjánsson og fleiri gamaldags einangrunarsinnar sem hafa orðið viðskila við nútímann og horfa ekki til framtíðar.
Athygli vakti að þorri þingmanna Sjálfstæðisflokksins og Framsóknar valdi að kjósa ekki gegna þjóðaratkvæðagreiðslunni en 14 þingmenn sátu hjá við afgreiðslu málsins á Alþingi. Þessir þingmenn og flokkar hafa áttað sig á því hve neikvætt það er að snúast gegn þjóðinni og þar með kjósendum til að freista þess að koma í veg fyrir að kjósendur fái að hafa þau áhrif sem þeim ber í því stóra hagsmunamáli þjóðarinnar sem hér um ræðir. Gera má ráð fyrir að þessi afstaða forystu Sjálfstæðisflokksins og Framsóknar muni hafa jákvæð áhrif á kjósendur flokkanna þegar kemur að kjördegi þann 29. ágúst 2026.
Orðið götunni er að jáliðar vænti þess að Sigríður Andersen verði sem fyrirferðarmest í umfjöllun um þjóðaratkvæðagreiðsluna á næstu vikum og fram að kjördegi. Í hvert sinn sem hún kemur fram fjölgar í liði þeirra sem munu segja já. Fólk er ekki búið að gleyma pólitískum ferli Sigríðar en hún var hrakin úr ríkisstjórn Katrínar Jakobsdóttur og Bjarna Benediktssonar eftir að hafa hlotið dóm fyrir lögbrot í starfi ráðherra. Vinstri græn kröfðust þess þá að henni yrði vikið úr ríkisstjórninni og formaður Sjálfstæðisflokksins gerði ekkert til að verja hana og koma í veg fyrir brottvikningu. Hann leyfði að Sigríði Andersen yrði fórnað eftir að hafa brotið lög í embætti ráðherra.
Fólk af því tagi verður seint talið trúverðugt og ekki heppilegt til að leiðbeina þjóðinni í mikilvægum málum.
