Háskólinn á Akureyri hefur sett á laggirnar Rannsóknarmiðstöð um málefni innflytjenda. Miðstöðin á að safna og greina gögn til þess að styðja opinbera stefnumótun um innflytjendur.
Innflytjendum á Íslandi hefur fjölgað hratt á Íslandi á síðustu áratugum. Þeir eru nú 18,9% íbúa landsins samanborið við 7,4% árið 2012. Annarrar kynslóðar innflytjendum hefur líka fjölgað.
Mikilvægt er að byrja að safna og greina gögn til þess að styðja við inngildingu innflytjenda í samfélagið, segir Markus Meckl, sem leiðir verkefnið í Háskólanum á Akureyri.
Það séu ýmis aðkallandi verkefni og markmið miðstöðvarinnar sé að þróa lausnir. Dæmi frá Þýskalandi sýni að ekki megi hundsa innflytjendur: „Eins og við höfum séð í Þýskalandi er ekki gáfulegt að hundsa innflytjendur heldur þurfi að aðstoða. Þess vegna er miðstöð eins og þessi nauðsynleg.“
Innflytjendur koma ekki og fara, þeir setjast að
Á opnunarviðburði Rannsóknarmiðstöðvarinnar á föstudaginn var Noa K. Ha með fyrirlestur um mikilvægi rannsókna á sviði innflytjenda. Hún er framkvæmdastjóri sambærilegrar stofunnar í Frankfurt og segir að spurningar sem snúi að inngildingu innflytjenda í samfélagið séu margþættar og þær verði að rannsaka.
Þjóðverjar hafi gert þau mistök að halda að innflytjendur myndu koma og fara en þeir fóru ekki, heldur settust að: „Það eru fjölmargar spurningar tengdar innflytjendum sem þarfnast svara til dæmis húsnæði, menntun, heilsufar og svo framvegis. Það er það sem við höfum lært í Þýskalandi og við hundsuðum of lengi. Við héldum að innflytjendurnir myndu koma og síðan fara en þeir fóru ekki heldur settust að,“ sagði Noa K. Ha
Fjármögnun verkefnisins er ekki tryggð til lengri tíma en að sögn Markusar er nóg til að byrja með: „Við höfum fjármagn til þess að hefja vinnuna en við þurfum varanlegt fjármagn til þess að hafa fastar stöður til að safna og greina gögn. Þetta er fjárfesting.“
