Samkeppniseftirlitið hefur þegar hafið undirbúning á verðlagseftirliti á eldsneyti til að tryggja að tímabundin skattalækkun sem tekur gildi á morgun skili sér til neytenda, eins og lögin gera ráð fyrir. Virðisaukaskattur á eldsneyti verður lækkaður úr 24% í 11% frá 1. maí til 31. ágúst.
Samkeppniseftirlitið hefur heimild til að sekta fyrirtæki sem brjóta gegn lögunum. Auk þess má ráðherra setja reglugerð um tímabundnar aðgerðir, til dæmis að sett verði hámarksverð eða hámarksálagning og fleira til að stýra verðlagningu.
Í tilkynningu Samkeppniseftirlitsins kemur fram að eftirlitsins sé þörf vegna fákeppnisaðstæðna á eldsneytismarkaði og veikrar samkeppni.
„Í virku samkeppnisumhverfi ætti ekki að vera þörf á eftirliti með verðlagningu keppinauta.“
Vísað er í niðurstöður skýrslna um eldsneytismarkað síðasta áratuginn þar sem meðal annars kemur fram að við aðstæður sem á honum ríkja sé „óráðlegt af stjórnvöldum að ganga út frá því að lækkun eldsneytisgjalda skili sér að öllu leyti í lægra eldsneytisverði til neytenda, enda eru þeir í erfiðri stöðu að fylgja því eftir“.
Grunur um hækkun frá upptöku kílómetragjalds
Erfitt hafi reynst að fá afhent gögn frá fyrirtækjum til að leggja mat á þróun álagningar á eldsneyti í kjölfar þess að eldsneytisgjöld voru felld niður samhliða innleiðingu kílómetragjalds.
Fyrsta skoðun þeirra gagna sem þó bárust gefi til kynna að ályktanir ASÍ, FÍB og einstakra verkalýðsfélaga, um að olíufélög hafi aukið álagningu eða hækkað eldsneytisverð, séu á rökum reistar.
