Stjórnmálafræðingur segir flokkahollustu það sem skýri mest hvað fólk komi til með að kjósa. Hann segir ólíklegt að ríkisstjórnin falli verði niðurstaðan nei.
Ómögulegt að spá fyrir um úrslit
„Þetta virðist vera hnífjafnt. Og eiginlega út frá gögnunum sem við höfum er algjörlega ómögulegt að spá fyrir um það hvort já-ið verður ofan á eða nei-ið verður ofan á,“ segir Ólafur Þ. Harðarson, stjórnmálafræðingur, í Vikulokunum á Rás 1.
„En auðvitað er hugsanlegt að kannanirnar séu vitlausar. En þegar þetta er svona jafnt eru allar líkur á því að kjörsóknin eða kjörsókn ólíkra hópa geti ráðið úrslitum,“ segir Ólafur Þ. Harðarson, stjórnmálafræðingur, í Vikulokunum á Rás 1.
Sjaldan hafi kosningar hér á landi verið jafnari eða jafn spennandi.
Ólafur segir að sögulega hafi kjörsókn í þjóðaratkvæðagreiðslum verið minni en í þingkosningum.
„Miðað við hvað margir hafa kosið utan kjörfundar, og mér sýnist vera stemning líka, kæmi mér ekkert á óvart að kjörsóknin yrði 75%, jafnvel að hún færi upp í 80% eins og venjan er í þingkosningum.“
Flokkahollusta skipti höfuðmáli
Ólafur segir eina breytu geta riðið baggamuninn þegar kemur að því hvað fólk muni koma til með að kjósa.
„Það er hvaða stjórnmálaflokk menn hyggjast kjósa í næstu kosningum. Hjá Samfylkingunni og Viðreisn eru það milli 90 og 100 prósent sem ætla að segja já. Hjá Miðflokknum ætla í kringum 95 prósent að segja nei, hjá Sjálfstæðisflokknum einhver 87 prósent að segja nei,“ segir Ólafur, og heldur áfram.
„Þarna kemur upp sú staða sem stjórnmálaforingjar ættu að elska, nefnilega það að hinn breiði lýður fylkir sér að baki foringjunum og kýs eins og foringjarnir leggja til.“
Ólíklegt sé að niðurstaðan hafi áhrif á innanlandspólitíkina.
„Auðvitað væri það vont fyrir ríkisstjórnina að tapa þessu, ef nei-ið ynni. En myndi það leiða til þess að ríkisstjórnin segði af sér? Það er ekkert sem bendir til þess.“
