Farice undirbýr nýjan sæstreng milli Íslands og Skotlands sem áætlað er að verði tekinn í notkun árið 2030. Farice, sem er að fullu í eigu íslenska ríkisins, rekur þegar sæstrengina FARICE-1, DANICE og ÍRIS. FARICE-1 er sá elsti og er fyrirhugað að nýi strengurinn taki við af honum.
Hann hlýtur nafnið AUÐUR og er þar vísað til landnámskonunnar Auðar djúpúðgu Ketilsdóttur sem sigldi frá Skotlandi eins og fjallað er um í Laxdæla sögu, að því er segir í tilkynningu Farice.
Gert er ráð fyrir að nýr afhendingarstaður verði þróaður í Glasgow eða Edinborg. Þaðan liggja öflugar tengingar til helstu fjarskiptamiðstöðva Evrópu, þar á meðal London, Dublin, Amsterdam og Norðurlanda.
Farice segir að með þessu stækki net fyrirtækisins verulega og umferðartími milli Íslands og helstu fjarskiptamiðstöðva í Evrópu styttist. Þá hafi FARICE-1, elsti strengur félagsins, verið lagður árið 2003 og með nýjum streng sé tryggt að inniviðir séu endurnýjaðir með góðum fyrirvara.
Sjávarbotnskönnun vegna lagningar strengsins er fyrirhuguð sumarið 2027. Gert er ráð fyrir að AUÐUR verði búin mjög mikilli flutningsgetu til að mæta ört vaxandi þörfum, meðal annars vegna uppbyggingar gagnavera. Áætlað er að hún verði með 16–24 ljósleiðarapör.
