Næsti lausi tími er 12. maí

„Þetta fer bara hörkuvel af stað. Við erum með sterka stráka og þetta rúllar eins og góður handboltaleikur,“ segir Þórður Þrastarson á dekkjaverkstæði Kletts við Hátún í Reykjavík.

Frá og með 15. apríl eru nagladekk undir bílum bönnuð og því hafa verið annir á dekkjaverkstæðum síðustu daga. Á mörgum dekkjaverkstæðum getur fólk pantað tíma og segir Þórður að það hafi gefist vel hjá Kletti. Þar fyrir utan hafa viðskiptavinir fengið að skilja eftir bíla ef von er um að tími gefist til að þjónusta þá.