Þó margir hafi setið límdir við skjáinn að fylgjast með knattspyrnunni í gærkvöldi var mögnuð stemning á vel sóttri Skötumessu að sumri, sem haldin var í Gerðaskóla í Garði, að sögn Ásmundar Friðrikssonar, fv. þingmanns og forsprakka messunnar.
„Knattspyrnan setti auðvitað sinn svip á hana og við vorum í hálfgerðri samkeppni við leikinn, en það mættu samt sem áður um 300 manns og við afhentum þarna um það bil fimm milljónir til góðgerðarmála,“ segir hann í samtali við mbl.is.
„En þetta var alveg magnað, og tókst rosalega vel. Inga Sæland kom og sló í gegn, tók lagið Ég er kominn heim og gerði bara stormandi lukku.“
Hlaðgerðarkot hlaut stærsta framlagið
Síðustu sautján ár hefur Skötumessan farið fram í Garði, og þar hefur samtals safnast á annað hundrað milljóna króna sem afhentar eru til góðgerðarmála yfir þjóðlegu hlaðborði þar sem kæst skata er í öndvegi. Í ár voru um fimm milljónir í styrkjum veittar til góðgerðarmála, þar á meðal til Samhjálpar.
„Stærsta framlagið í ár var í samstarfi við BM Vallá og rann til Hlaðgerðarkots til þess að hjálpa við að flytja kirkju sem þau fengu gefins árið 2023, þegar Samhjálp varð 50 ára, og þó það hafi gengið hægt fyrir sig gerum við okkur vonir um að því verki verði lokið í ágúst,“ segir hann.
Fleiri góðgerðarmál styrkt
Hin fullbúna kirkja mun taka um 30 manns í sæti, og á að verða bænastaður fyrir þá sem vilja sækja sér andlegan styrk til að mæta nýjum áskorunum í lífinu uppi í Hlaðgerðarkoti, sem er meðferðarheimili þar sem boðið er upp á tólf vikna meðferð við fíknisjúkdómum.
„Síðan vorum við að styðja fjölskyldu í Vogum sem missti heimili sitt í bruna, við styrktum krabbameinsveika sem að eru annars vegar að lenda í þeim hremmingum að vera á upphafsstigi sjúkdómsins, og svo annar sem var að stíga út úr því, og fleiri til. Við erum mikið að styðja fólk sem er að lenda í áföllum.“
Lávarðadeildin í fullum skrúða og Ottoló-bræður keikir
Skötumessan fer ávallt fram í kringum 20. júlí þegar Þorláksmessa að sumri til er haldin hátíðleg, og þar er oftar en ekki mikið um dýrðir.
„Þarna mættu líka félagar Lávarðadeildar klúbbs matreiðslumeistara í fullum herklæðum, og svo komu þeir Kristján Magnússon frá Minna-Hofi á Rangárvöllum og Óskar Ívarsson og sungu á meðan Sigurbjörn Dagbjartsson úr Grindavík lék undir með þeim.“
Margir þeirra sem mættu vildu ólmir fá myndir af sér, þar á meðal Eiríka Sigurðardóttir sem hefur virkilega gaman af hátíðinni.
Hópurinn sem stendur að skötumessunni ásamt Ásmundi samanstendur af Ottoló-bræðrum úr stúkunni Jóni forseta, en þeir leggja þó áherslu á að skötumessan sé afrakstur sameiginlegrar vinnu allra sem að henni koma, ekki síst gestanna.
