„Munu Íslendingar þurfa að beygja sig undir herskyldu Evrópusambandsins?“
Þessari spurningu varpaði Nanna Margrét Gunnlaugsdóttir, þingmaður Miðflokksins, fram í ræðu sinni á Alþingi í dag. Til umræðu er þjóðaratkvæðagreiðsla um framhald viðræðna um aðild Íslands að Evrópusambandinu.
„Eins og staðan er núna þá er ekki evrópskur her, hins vegar er nokkuð auðvelt fyrir Evrópusambandið, ef aðstæður breytast, að breyta því,“ sagði hún.
Nanna sagði að ræðan yrði sú síðasta sem hún myndi halda í þessari umræðu en þingmenn Miðflokksins hafa stigið í pontu hver á fætur öðrum undanfarna daga og rætt málið.
Ríkisstjórnin ekki veitt svör
„Þessi umræða hefur miðað að því að tryggja að upplýsingar liggi fyrir og forsendur aðildarviðræðna, svo sem samningsmarkmið, liggi fyrir þannig að almenningur geti tekið upplýsta ákvörðun í þjóðaratkvæðagreiðslu.“
Hún sagði að því miður hefði ríkisstjórnin ekki veitt þau svör sem sóst hefur verið eftir.
„Og því mun mæða mikið á okkur í sumar að koma upplýsingum til þjóðarinnar, því ekki getum við treyst ríkisstjórninni.“
Gagnrýnir hælisleitendastefnu sambandsins
Þá nefndi hún innviðaskuld sambandsins og stefnu þess í hælisleitendamálum.
„Hælisleitendapakki Evrópusambandsins er auðvitað alveg afleitur. Evrópusambandið er byrjað að sekta lönd sem neita að fylgja pakkanum, lönd sem segja það ekki koma til greina því pakkinn er svo ónýtur.“
Segir Þorgerði fara með rangt mál
Hún segir varanlegar undanþágur ekki hafa verið veittar síðan árið 2004 og segir Þorgerði Katrínu Gunnarsdóttur utanríkisráðherra hafa farið með rangt mál er hún hélt því fram að Króatía hefði ekki sóst eftir slíkum undanþágum.
„Þeir óskuðu eftir varanlegum undanþágum í sjávarútvegsmálum en fengu það ekki. Það endaði þannig að þeir drógu það til baka því þeir sáu að annars myndu samningar við Evrópusambandið sigla í strand.“
