Liðsmenn salvadorska glæpagengisins MS-13 eiga yfir höfði sér mörg þúsund ára fangelsisrefsingu fyrir tugþúsundir glæpa.
Fjöldaréttarhöld yfir 485 liðsmönnum gengisins hófust í apríl. Þeir eru alls sakaðir um 47 þúsund glæpi á árunum 2012 til 2022.
Nayib Bukele, forseti El Salvador, lýsti yfir neyðarástandi og stríði á hendur glæpagengjum árið 2022. 93 þúsund liðsmenn glæpagengja hafa verið handteknir síðan.
Meðal sakborninga í fjöldaréttarhöldunum sem nú standa yfir eru 22 leiðtogar MS-13 gengisins. Þeir hafa þegar verið sakfelldir fyrir fjölda glæpa, en meðal þess sem þeir eru sakaðir um að þessu sinni eru 29 þúsund morð.
Varasaksóknari í El Salvador segir að þessir menn eigi aldrei eftir að yfirgefa fangelsiskerfið.
Einn ákærðu er hinn 47 ára Borromeo Henriques, stundum kallaður Litli djöfullinn í Hollywood. Hann situr þegar í fangelsi fyrir 497 morð og fékk alls 87 ára dóm fyrir þau og aðra glæpi. Saksóknari segir Henriques nú eiga yfir höfði sér 15 til 25 þúsund ára fangelsisvist.
Hugsanlegir glæpir gegn mannkyninu
Mannréttindasamtök hafa gagnrýnt fjöldahandtökur undir yfirskyni neyðarástands. Þau segja dómskerfi El Salvador skorta sjálfstæði og að stríðið gegn glæpagengjum kunni að hafa leitt til glæpa gegn mannkyni. Forseti landsins segir tilganginn helga meðalið.
